اوکرایني ولسمشر وولودیمیر زېلېنسکي ویلي دي چې له ترکیې څخه یې له ځان سره هغه پینځه قومندانان هېواد ته رسولي دي چې د ده په وینا، روسیې تېر کال په ماریوپول ښار کې د ظالمانه جګړو پر مهال نیولي ول.
پر اوکراین د روسیې د یرغل په لومړیو میاشتو کې په هغه ښار کې پراخې نښتې وشوې او بیا اوکرایني سرتېري او قومندانان یې تر اوږدې مودې د ازوفستال د فولادو په کارخانه کې بند پاتې ول.
کرېملېن د زېلېنسکي پروني اقدام ته تند غبرګون ښوولی دی او ویلي یې دي چې روسیې ته د قومندانانو د خوشې کولو اطلاع نه وه ورکړل شوې.
ار ای اې اژانس بېګا د کرېملېن د ویاند دېمېتري پېسکوف له خولې وویل چې هېواد ته د قومندانانو ستنېدل د اوکراین او ترکیې حکومتونو ترمینځ د اوسنیو موافقو د شرایطو مستقیمه سرغړونه ده.
کییف د ۲۰۲۲ز کال په سېپټېمبر کې اعلان وکړ چې د لسګونه روسیو بندیانو او یوه روسي پلوي سیاستوال په بدل کې یې ۲۱۵ سرتېري خوشې شوي دي.
ولسمشر زېلېنسکي هغه مهال ویلي ول چې د موافقې له مخې او د ترکیې د ولسمشر رجب طیب اردغان په همکارۍ به پینځه واړه قومندانان د جګړې تر پای پورې په ((بشپړ امنیت او هوسا شرایطو)) کې په ترکیه کې پاتې کېږي.
البته نوموړي د جولايي پر اتمه کییف ته د ستنېدو پر مهال په سمدستي ډول دا سپیناوی و نه کړ چې هغو قومندانانو ته په دې وخت کې هېواد ته د ستنېدو اجازه ولې ورکړل شوې ده.
تېر کال په مې میاشت کې د ماریوپول ښار او د ازوفستال کارخانې اوږده محاصره پای ته ورسېده. د جګړو له کبله هغه ښار په بشپړه توګه وران شو او بیا ۲،۵۰۰ اوکرایني سرتېري روسیو ځواکونو ته تسلیم شول.
