د فرانسې ولسمشر اېمانوېل مکرون پر ايران غږ کړی چې د اوکراين په جګړه کې دې روسیې ته د ډرون الوتکو ورکول ودروي.
رويټرز خبري اژانس ليکلي چې د جون پر ۱۰ مه،مکرون له خپل ايراني سيال ابراهيم رييسي سره په ټېلېفوني خبرو کې هغه ته خبرداری ورکړ چې د روسیې ملاتړ ودروي.
تهران لا د مکرون د څرګندونو په غبرګون کې څه نه دي ویلي.
غربي هېوادونه تور پورې کوي چې روسیې په اوکراین کې د پوځي او ملکي اهدافو پر ضد د ایران جوړ سلګونه جنګي ډرونونه او داسې نورې بې پیلوټه الوتکې کارولې دي چې پر هدف ورغورځي او چوي.
برتانیا، فرانسه، جرمني، امريکا او اوکراین وايي، روسیې ته د ایران له خوا د بې پیلوټه الوتکو ورکول د ملګرو ملتونو د امنیت شورا د ۲۰۱۵ز کال د پرېکړه لیک سرغړونه ده.
په هغه پرېکړه لیک کې پر تهران د وسلو د درامد (واردولو) او برامد (صادرولو) بندیز لګېدلی وو.
روسیې په جګړه کې د ایرانیو ډرون الوتکو له کارولو انکار کړی دی خو ایران دا منلې چې هغه هېواد ته یې بې پیلوټه الوتکې د هغه قرارداد له مخې ورکړې دي چې په فېبرورۍ کې پر اوکراین د روسیې تر یرغل مخکې شوی وو.
