د خيبر پښتونخوا په هنګو کې د ګېس او تېلو راايستلو يوې شخصي کمپنۍ پر کارکوونکو وسلوال بريد کې څلور سرتېري او دوه امنيتي ساتونکي وژل شوي دي.
د هنګو پولیسو ضلعي مشر اصف بهادر نن (د مې پر ۲۳مه) مشال راډیو ته وويل چې تېره شپه یو شمېر نامعلومه وسلوالو د ټل په منجي خیلو کې د "مول" کمپنۍ پر امنيت ګومارل شويو ساتندويانو په وړو او لويو وسلو سره بريد وکړ چې په نتيجه کې يې د يوې شخصي امنيتي کمپنۍ پر دوو ساتونکو سربېره د سرحدي ځواک (اېف سي) څلور سرتېري ووژل شول.
بهادر ادعا وکړه، برید کوونکي له وزیرستانه ورغلي ول او د هغه په وينا غوښتل یې چې د "مول" کمپنۍ کارکوونکي يا نوره عمله له ځان سره وتښتوي. د نوموړي په وينا د پياوړي مقاومت په نتيجه کې وسلوال پرشا وتمبول شول او په خپل مقصد کې بريالي نه شول.
پوليس په ځوابي کاروايي کې وسلوالو ته هم د ځاني زيان رسېدو ادعا کوي خو خپلواکو سرچينو يې لاهم تصديق نه دی کړی.
په منجي خیلو کې تر برید وروسته وسلوال تښتېدلي خو په سیمه کې د هغوی پرضد د لټون عملیات روان دي.
په هنګو ضلع کې "مول" کمپنۍ له اوږدې مودې راهیسې له کوهیانو د ګېس او تېلو راایستلو کار کوي.
تر دې وړاندې هم د ۲۰۲۲ز کال په جنورۍ مياشت کې په ګورګوري سیمه کې موجود د دغې کمپنۍ پر يوه کوهي باندې برید شوی وو چې يو امنيتي ساتونکی پکې وژل شوی وو.
تر دې دمه پر "مول" کمپنۍ د اوسني او تېر بريد ذمه واري چا نه ده منلې.
په خيبر پښتونخوا کې وخت نا وخته د ګېس او تېلو راايستلوپر کمپنيو بريدونه کېږي چې د زياترو مسوليت چا نه دی منلی.
