د پاکستان پوځ دعوه کړې چې د شمالي وزیرستان په میرلي کې یې د ځانمرګو بریدونو یو مهم پلانوونکی وژلی دی.
د شمالي وزیرستان په میرامشا کې یو پوځي چارواکي چې له رسنیو سره یې د خبرو اجازه نه لرله، د نوم پټ ساتلو په شرط مشال رېډیو ته ویلي چې وژل شوی تن صدام نومېده چې په لنګړا هم پېژندل کېده او د ناقانونه تحریک طالبان پاکستان ډلې د ځانمرګو بریدونو له مرکزي منتظینو څخه یو وو.
د چارواکي په خبره، امنیتي ځواکونو استخباراتي معلومات ترلاسه کړي ول او د مې پر ۱۱مه یې نوموړی د میرلي په یو هوټل کې په نښته کې وژلی دی.
هغه وویل، امنیتي ځواکونو غوښتل چې لنګړا و نیسي خو هغه د تېښتې پر مهال ووژل شو.
تحریک طالبان پاکستان لا د پوځ د دعوې په اړه څه نه دي ویلي.
په شمالي او جنوبي وزیرستانونو، بنو، لکي مروت او شاوخوا سیمو کې د تېرو څو میاشتو راهیسې د وسلوالو خلاف د پوځ ځانګړي عملیات دوام لري.
د روانې میاشتې پر اوومه هم د پاکستان پوځ په شمالي وزیرستان کې د شپږو مشکوکه وسلوالو د وژنې دعوه کړې وه.
د پاکستان پوځ په تېرو میاشتو کې د عملیاتو پرمهال په شمالي وزیرستان کې د لسګونو مشکوکو وسلوالو د نیولو او ورته د مرګژوبلې اړولو دعوې کړې دي چې مشال راډیو یې په خپلواکه توګه نه شي تصدیقولای.
د پاکستاني پوځ ویاند جنرال احمد شریف چودري د اپرېل پر ۲۵مه په راولپېنډۍ کې یوې خبري غونډې ته وویل، په پاکستان کې پوځ، پولیس او نورې امنيتي ادارې هره ورځ تر ۷۰ زيات عمليات کوي.
