د پاکستان او نیو زیلینډ د کرکټ ملي لوبډلې د پینځو یو ورځنیو یا ۵۰ اووره سیالیو لوبلړۍ په درېیمه لوبه کې یو بل ته مخامخېږي.
د مې پر درېیمه د کراچۍ په لوبغالي کې د دواړو لوریو سیالي د پېښور پر وخت ماسپښین درې نیمې او د کابل پر درو بجو پیلېږي. دا سیالي نیو زیلینډ ته ځکه مهمه ده چې تر دې مخکې د لوبلړۍ دوه سیالۍ پاکستان ګټلې دي.
د اپرېل پر ۲۹مه پاکستانۍ لوبډلې نیو زیلینډ ته په اووه وېکټو ماتې ورکړې وه. تر دې مخکې د اپرېل ۲۷مې سیالي هم پاکستان ګټلې وه.
ټاکل شوې دواړه لوبډلې د مې پر پینځمه او اوومه وروستۍ دوه سیالۍ وکړي.
د نيو زيلینډ د کرکټ لوبډله د اپرېل پر ۱۱مه پاکستان ته ورسېده او لومړی يې هلته له کوربه هېواد سره پينځه ۲۰ اووره سیالۍ وکړې چې دوه پاکستان او دوه نيو زيلېنډ وګټلې او يوه لوبه د باران له وجې بې نتيجې پاتې شوه چې په دې ډول لوبلړۍ مساوي پاتې شوه.
