ملګرو ملتونو اټکل کړی دی د روان کال په نیمايي کې به هند د نړۍ تر ټولو زیات نفوس لرونکی هېواد شي.
سازمان د اپرېل پر ۱۹مه په یو راپور کې وړاندوینه کړې چې سږ کال به د هند د وګړو شمېر له چینه زیات شي. چین اوسمهال په نړۍ کې تر ټولو زیاته ابادي لرونکی هېواد دی.
د ملګرو ملتونو د نفوسو چارو صندوق (ډبلیو پي پي) په رپورټ کې راغلي، د روان کال تر نیمایي به د هند ابادي څه د پاسه ۱.۴۲۸۶ اربه شي. د دې مقابل د چین ابادي به څه د پاسه ۱.۴۲۵۷ اربه ته ورسي.
د نړۍ نفوس تېر کال اته اربه ته ورسېد. په ۲۰۲۲ز کال کې د هند د وګړو شمېر ۱.۴۱۲ اربه او د چین هغه ۱.۴۲۶ اربه وو.
له ۱۹۶۰ز کال راهیسې، په چین کې په لومړي ځل، تېر کال د ابادۍ زیاتېدو رفتار کم شو. تر دې مخکې چینايي انقلابي مشر ماو زېتونګ د زراعتي تګلارو له امله په مېلیونونو خلک له لوږې مړه شوي ول.
بیجنګ په ۲۰۱۶ز کې د یوازې یو ماشوم زېږولو هغه تګلاره ختمه کړه چې حکومت په ۱۹۸۰ز لسیزه کې په تېزۍ د ابادۍ زیاتېدو مخنیوي لپاره عملي کړې وه.
چینايي حکومت په ۲۰۲۱ز کال کې خلکو ته د درو ماشومانو پیدا کولو اجازه ورکړه.
