د سعودي بهرنیو چارو وزارت وایي، په تهران کې د سفارت او په مشهد کې د قونسلګرۍ پرانیستلو په اړه له ایرانیو چارواکو سره خبرې کوي.
وزارت د اپرېل پر اتمه په بیان کې ویلي، سعودي چارواکي د چارو د کړنلارې ټاکلو لپاره د خبرو په موخه ایران ته رسېدلي دي.
دا په داسې حال کې ده چې د سیمې د هغو دوو ځواکمنو هېوادونو ترمینځ په مارچ کې د اړيکو بيا بحالولو لپاره د چين په منځګړيتوب هوکړه وشوه.
تر دې وړاندې د اپرېل پر شپږمه په بیجنګ کې د سعودي عرب د بهرنیو چارو وزیر شهزاده فیصل بن فرحان آل سعود او د هغه د ایراني سیال حسین امیر عبداللهیان ترمینځ د اووه کلونو په موده کې لومړی رسمي ملاقات شوی وو.
سعودي عرب د ۲۰۱۶ز کال په جنورۍ کې د شیخ نمر النمر په نامه د يو شيعه ديني مشر په ګډون ۴۷ کسان اعدام کړي ول چې تر هغه وروسته په تهران کې قهرجنو مظاهرچيانو د سعودي سفارت ځينو برخو ته اور اچولی وو.
تر دې وروسته ریاض له تهران سره سفارتي تعلقات پرې کړی ول.
