د اوکراین ولسمشر وولودیمیر زېلېنسکي له اروپايي مشرانو غوښتي چې د اوږد واټن ویشتونکو توغندیو او جنګي جیټ الوتکو په ګډون د وسلو اکمالات چټک او زیات کړي.
د مارچ پر۲۳مه، د خېرسون جنوبي سیمې تر سفر وروسته زېلېنسکي وویل چې د اوږده واټن ویشتونکو توغندیو او جنګي الوتکو په استولو کې ځنډ ښايي جګړه وغځوي.
د خېرسون په جنوبي سیمه کې تیر کال اوکرایني ځواکونو د جګړې په ډګر کې بریا تر لاسه کړې وه.
د زېلېنسکي وینا وه چې وخت مهم دی. نه یوازې میاشتې او اوونۍ، بلکې ورځې. چې هرڅومره ژر یوځای اقدام وکړو ، هغومره د ډیرو خلکو ژوند به وژغورل شي.
د اوکراین ولسمشر د مارچ پر۲۳مه د اروپا مشرانو ته په یوه ویډیوي خطاب کې چې هغه خېرسون ته د اورګاډي په واسطه د سفر پرمهال ثبت کړی و، وویل چې "که چیرې اروپا زړه نه زړه شي نو شرارت پېشه خلک به نور هم موقع پیدا کړي چې بیا سره راټول شي او د کلونو جګړو لپاره ځان چمتو کړي."
له غونډې وروسته په یوه خبري کنفرانس کې د اروپايي کمیسیون مشرې اروسولا وان دیر لاین وویل، چې د روسیی پر ضد هر ډول نوي بندیزونه به تر ډیره دهغه چا په خلاف وي چې له پخوانیو بندیزونه سرغړونه وکړي.
هغې دا هم وویل چې اروپايي اتحادیه به د نورو سازمانونو سره کار وکړي ترڅو روسیې ته اخراج شوي اوکرایني ماشومان ومومي او د دوی بیرته راستنیدو لپاره فشار راوړي.
