د خیبر پښتونخوا استادانو په بني ګالا کې احتجاج کړی
د خیبر پښتونخوا د سرکاري سکولونو نویو استادانو د پېنشنونو ختمېدو ضد د اسلام اباد په بني ګالا کې د تحریک انصاف ګوند مشر عمران خان کور مخې ته احتجاجي پرلت وهلی دی. دوی د جون پر ۱۹مه د احتجاج پیلولو پر مهال مشال راډیو ته وویل، صوبايي حکومت د نویو ګومارل شویو سرکاري کارکوونکو پېنشن ختم کړی دی او پر ځای یې د کنټرېبیوټر پراوېډنټ (سي پي) فنډ په نوم یو صندوق پرانیستی دی چې پکې هر کارکوونکی د تنخا یوه برخه وراچوي او حکومت هم پکې له خپلې خوا پیسې اچوي. په دې توګه کارکوونکي د تقاعدېدو یا ریټاېرېدو پر وخت د میاشتني پېنشن پر ځای یو ځل پیسې تر لاسه کوي، احتجاج کوونکي وايي، په خیبر پښتونخوا کې یې د تحریک انصاف حکومت خبره نه اوري، ځکه بني ګالا ته تللي دي. د خزانې صوبايي وزیر تیمور سلیم جګړا وايي، د نویو سرکاري کارکوونکو پېنشن یې ځکه ختم کړی چې حکومت یې نه شي ورکولای. ویډیويي رپورټ.