د امریکا د دفاعي چارو پخوانی وزیر ډانلډ رمسفېلډ د جون پر ۳۰مه نېټه (پرون) د ۸۸ کلونو په عمر کې ومړ. نوموړی لومړی له ۱۹۷۵ تر ۱۹۷۷ز کلونو او بیا له ۲۰۰۱ څخه تر ۲۰۰۶ پورې د امریکا د دفاع وزیر پاتې شوی وو.
رمسفېلډ د خپل وزارت په دویمه دوره کې پر افغانستان او عراق د امریکا د حملې له اصلي مدیرانو بلل کېږي.
د امریکا پخواني ولسمشر جارج ډبلیو بوش د خپلې واکمنۍ پر مهال د رمسفېلډ د ښو خدماتو ستاینه کړې ده. نوموړي په بیان کې ویلي چې رمزلفېډ ((په جنګي حالاتو کې په قوت، مهارت او عزت)) د دفاع وزارت چارې پر مخ وړې وې.
د افغان سولې لپاره د امریکا خاص استازي زلمي خلیلزاد د امریکا د دفاع دا پخوانی وزیر یو وطنپاله کس بللی چې د ده په خبره "د ۲۱مې پېړۍ د څو لانجمنو پرېکړو په مرکز کې و."
ښاغلي خلیلزاد که څه هم له رمسفېلډ سره د خپلو مخالفتونو یادونه کړې، خو په منځنۍ اسیا او قفقاز کې یې د هغه خدمات ستایلي.
