د لاسرسي ځای

تازه خبر

افغانستان کې موجود امنیتي خطرونه لا هم جدي دي: سټولټنبرګ


د ناټو سرمنشي ینس سټولټنبرګ

د نیټو سرمنشي وايي، تر دوو لسیزو وروسته په افغانستان کې د نیټو پوځي ماموریت پای مومي، خو په نورو برخو کې به له افغانستان سره د دې پوځي تړون مرسته او همکاري دوام کوي.

ینس سټولټنبرګ وايي، په افغانستان کې موجود امنیتي خطرونه لا هم جدي دي او دوی ورباندې خبر دي.

ینس سټولټنبرګ په افغانستان کې د موجوده ګواښونو په اړه د مشال راډیو د پوښتنې په ځواب کې وویل، په تېرو ۲۰ کلونو کې د افغانستان امنیتي ځواکونه په پښو درېدلي او د خطرونو مقابله کولای شي.

نوموړي وویل: "موږ د افغانستان امنیتي ځواکونه له صفره په پیاوړو او ظرفیت لرونکو ځواکونو بدل کړل. فکر مو وکړ اوس د دې وخت دی چې په افغانستان کې خپل ماموریت پای­ ته ورسوو. په عین حال کې خطرونه درک کوو او پر نورو لارو خپل ملاتړ ته دوام ورکوو چې تازه شوي تمرینونه، د افغان امنیتي ځواکونو مالي مرسته او په افغانستان کې د ملکي حضور دوام دی."

د ناټو د بهرنیو چارو او دفاع وزیرانو د جون پر لومړۍ نېټه په بروکسل کې په خپلو انلاین بحثونو کې د نورو مسایلو تر څنګ د افغانستان پر وضعیت هم بحث وکړ.

د ناټو سرمنشي ینس سټولټنبرګ وايي په تېرو ۲۰ کلونو کې د افغانستان امنیتي ځواکونه په پښو درېدلي
د ناټو سرمنشي ینس سټولټنبرګ وايي په تېرو ۲۰ کلونو کې د افغانستان امنیتي ځواکونه په پښو درېدلي

د نیټو سرمنشي ویلي چې د ناټو ملکي متخصصان به د افغانستان وزارتونو ته مشورې ورکوي او له افغان ځواکونو سره مالي مرسته کوي.

ینس سټولټنبرګ د نیټو د بهرنیو چارو او دفاع وزیرانو تر کنفرانسونو وروسته یوې خبري غونډې ته د ازادي راډیو د پوښتنې په ځواب کې وویل، د نیټو د دفاع وزیرانو د افغانستان د ملاتړ د دوام ژمنه بیا تازه کړه.

سټولټنبرګ زیاته کړه: "د وزیرانو په دې غونډه کې هم دا څرګند پیغام ورکړل شو چې دوی به د افغانستان د ملاتړ د دوام د پرېکړې ملاتړ کوي، په افغانستان کې به د نړیوالې ټولنې د حضور دوام ته سهولت برابروي او د کابل نړیوال هوايي ډګر ملاتړ به کوي. [له افغانستانه د وتلو] پرېکړه اسانه نه وه. موږ تر دوو لسیزو وروسته د خپل ماموریت د پای ته رسولو پرېکړه وکړه. اوس د دې وخت راغلی چې افغانان خپله د خپلې راتلونکې مسوول وي، په نهایت کې د افغانانو په مشرۍ او مالکیت د سولې خاوندان شي چې د افغانانو د راتلونکې مسوولیت په بشپړ ډول د دوی په خپل لاس کې وي."

بل خوا د ناټو د بهرنیو چارو او دفاع وزیرانو د غونډې په درشل کې د افغانستان دفاع وزیر ډاډ ورکړی و چې نړیواله ټولنه به تر ۲۰۲۴ز کاله پورې له افغانستان سره خپلو مرستو ته دوام ورکړي.

اسدالله خالد د مې پر ۳۱مه په کابل کې د کمانډو ځواکونو د فراغت په مراسمو کې وویل چې د اړتیا پر مهال به د بهرنیو قواوو هوایي ځواک له افغان پوځ سره هوایي مرسته هم وکړي.

دا څرګندونې داسې وخت کېږي چې له افغانستانه د بهرنیو ځواکونو د وتلو د پروسې له پیل سره جوخت په بېلابېلو ولایتونو کې د ناامنیو پېښې زیاتې شوي دي.

امریکا ویلي چې له افغانستانه یې د ځواکونو وتل د مې میاشتې له لومړۍ نېټې پیل شوي او د سېپټمبر میاشتې تر ۱۱ مې دوام کوي.

د فېسبوک تبصرې

ځانګړې پاڼې

له موږ سره اړیکي

XS
SM
MD
LG