په کوټه ښار کې د سړک غاړې ښخ بم له چاودنې د یوه ماشوم په ګډون پینځه کسان ژوبل شوي دي.
د سرياب تاڼې پوليسو مشال راډيو ته ويلي چادونه د مې پر ۲۴مه نېټه د کوټې، قمبراني سړک پر بشير چوک کې رامنځ ته شوه.
د بلوچستان حکومت وياند لياقت شاهواني پر تویټر پاڼه لیکلي چې زخميان د کوټې سول روغتون ته وړل شوي.
ډاکټران وايي، د ټپیانو روغتيايی حالت د اندېښنې وړ نه دی. تر اوسه چا د پېښې ذمه واري نه ده منلې.
تر دې وړاندې د تېرې جمعې پر ورځ هم په چمن کې د جمعیت علما اسلام نظرياتي ګوند له خوا پر غزه د اسراييل حملو پر ضد د مظاهرې پر مهال بمي چاودنه شوې وه چې پکې درې کسان وژل شوي او ۱۴ ټپيان ول.
