د افغانستان په غزني ولایت کې د هغو لسګونو کسانو په اړه لا معلومات نشته چې د ډېسېمبر پر ۲۸مه د یاد ولایت له قره باغ ولسوالۍ تښتول شوي دي.
د غزني د امنیه قوماندانۍ یوه افسر د نوم نه ښودلو په شرط مشال راډیو ته وویل چې ۳۰ تنه تښتول شوي دي.
خو د غزني د ولایتي شورا مرستیال امان الله کامراني بیا د تښتول شویو شمېر ۲۶ یا ۲۷ یادوي.
ده مشال راډیو ته وویل چې د طالبانو یو قوماندان ځايي پولیسو نیولی دی او طالبان د هغه په بدل کې کسان تښتوي.
ده وویل چې تښتول شوي کسان د غزني د قره باغ او جاغوري ولسوالیو اوسېدونکي دي.
طالبانو تراوسه په دې اړه څه نه دي ویلي.