د لاسرسي ځای

تازه خبر

حکومت وايي د ډاکټرانو غوښتنې مني خو اصلاحات اړین دي


د ډاکټرانو هړتال د خلکو ژوند اغېزمن کړی.

پېښورـ د خیبر پښتونخوا د اطلاعاتو وزیر وايي، د معترضو ډاکټرانو ټولې جایزې غوښتنې به منل کېږي.

شوکت یوسفزي د مې پر ۱۹ مشال راډیو ته وویل چې حکومت په دې لړ کې هر ډول مرستو او له ډاکټرانو سره مذاکراتو ته تیار دی.

نوموړي وویل:

"د دوی جایزې غوښتنې موږ پخوا هم منلې دي، اوس یې هم اورېدو ته تیار یو."

خو هغه وړاندې وویل، د هغو ډاکټرانو خلاف به هم کارروایي کېږي چې د ټولې صوبې ډاکټران یې د حکومت د اصلاحاتو پر ضد پارولي دي.

"چې کوم خلک ګړ بړ کوي، موږ د هغوی لېسټونه تیاروو، د هغوی خلاف به باقاعده ایکشن اخلو. قانوني کارروايي به کوو، کېدی شي هغوی د خپلو نوکریو نه هم لاس ووینځي."

په خیبر پښتونخوا صوبه کې ډاکټرانو لومړی له دې کبله مظاهرې پېل کړې وي چې دوی نه غواړي د ډوميسايل په بنياد يې دندې بدلې شي. وروسته دوی خپل احتجاج هغه وخت نور پسې اوږد کړ چې د صحت صوبايي وزير هشام انعام الله په مبيينه ډول پر يو مشر ډاکټر تشدد وکړ.

ډاکټرانو د مريضانو له کتو هم انکار کړی او وايي په دې توګه پر حکومت د خپلو غوښتنو لپاره فشار اچول غواړي.

خو د خېبر پښتونخوا حکومت وايي، دوی به د ډاکټرانو د روان احتجاج سربېره د اصلاحاتو عملي کولو ته دوام ورکړي.

شوکت یوسفزی وايي اصلاحات ډېر اړین دي، تر څو چې راغلي نه وي، په هسپتالونو کې خلکو ته سهولتونه نشي ورکول کېدی.

د ډاکټرانو د اتحادیې یو مشر فضل منان وايي دوی به هله خپل احتجاج ختموي چې د صحت صوبايي وزیر هشام انعام الله له خپلې دندې استعفا وکړي او د هغه خلاف پرچه کټ کړل شي. نوموړی وايي د پولیسو د هغه مشر ډي اېس پي خلاف دې پلټنې وشي چې پر ډاکټرانو یې تشدد کړی دی.

فضل منان وايي، حکومت دوی ته ګواښونه کوي او وايي چې د پولیسو په زور به ډاکټران په هسپتالونو کې کار کولو ته اړ باسي، خو د ده په وینا هېڅ یو ډاکټر کار ته نه دی حاضر شوی.

د خېبر پښتونخوا وزیر اعلی هم د ډاکټرانو د احتجاج نوټس اخېستی او د مې پر ۲۱مه یې د ډاکټرانو یو پلاوی د مزاکراتو لپاره غوښتی دی.

د مې پر ۱۸مه ډاکټرانو وویل، د وزیراعلی بلنه مني خو هړتال نه ختموي ځکه چې حکومت خپلې ژمنې نه پوره کوي.

XS
SM
MD
LG