د ایران ولسمشر حسن روحاني پر خپل هېواد د امریکايي بندیزونو غندنه کړې او دا یې اقتصادي ترهګري بللې ده.
د ډېسېمبر پر اتمه په تهران کې د ترهګرۍ پرضد د شپږو هیوادونو غونډې پر مهال روحاني وویل، که امریکا کامیابه او ایران کمزوری شو، نو غربي هیوادونه به له غیر قانوني مخدره موادو څخه ډک شي.
په غونډه کې د پاکستان، افغانستان، ترکیې، چین، ایران او روس د پارلېمان استازي ګډون کوي.
د ایران پر سرکاري ټي وي په خپرو شویو څرګندونو کې روحاني وویل که ایران کمزوری شو نو د مخدره موادو مخنیوي به ونه کړای شي.
ایران د مخدره موادو په غېر قانوني قاچاق کې د افغانستان او اروپا او د خلیج فارس هیوادونو ترمنځ پروت هېواد دی.
روحاني وویل، د ایران خلاف د امریکا غېر منصفانه او غېر قانوني بندیزونه د ترهګرۍ په مثال دي چې تهران یې په نښه کړی دی.
