د لاسرسي ځای

تازه خبر

خبرونه

ولسمشر پوټین: د فتبال نړیوال کپ ته مو تیاری کړی دی

د روس ولسمشر ولادمیر پوتین پرون اعلان وکړ چې هیواد یې د فټبال نړیوالو لوبو لپاره تیاري سر ته رسولې ده.

دغه لوبې راتلونکي میاشت د روس په یولسو ۱۱ ښارونو کې کېدونکې دي.

د فټبال لوبې نړیوال ایسوسي ایشن یا د فیفا له صدر جیاني اینفین تینو سره په سوچي ښار کې تر ملاقات وروسته پوتین وويل چې روس دغه ټورنامنټ ته تیار دی او یوازې یو څه اخیري کار پاتې دی.

پوتین وویل هیله لري چې د روس لوبډله به ښه کارکردګي وښيي.

روس د ۲۰۰۸م راهیسې د غټانوپه اروپايي چمیپین شپ لوبو کې د لومړي پړاو یا ګروپ سټيج پس مخکې نه دی وتلی.

په مشرقي اروپا کې پر لومړي نړیوال کپ به تر ټولو زیاتې پیسې خرچیږي.

دا لوبې په داسې وخت کیږي چې په شام کې د کیمیاوي وسلو مبینه برید، په برتانیا کې پخواني روسي جاسوس ته د زهر ورکولو او د امریکا لخوا د نویو بندېزونو په سر د روس او غرب تر منځ اړیکې ترینګلې دي.

د نننۍ ورځې ټول خبرونه وګورئ

جواد ظریف: منځني ختیځ ته د امریکايي عسکرو لېږل خطرناک دي

جواد ظریف

د ایران د بهرنیو چارو وزیر جواد ظریف ویلي د امریکا منځني ختیځ ته د نورو عسکرو لیږل د نړۍ د امن لپاره یو خطرتاک عمل دی.

جواد ظریف د مې پر ۲۵مه د ایران سرکاري خبري اژانس اېرنا ته ویلي چې د دوی په سیمه کې د امریکایي عسکرو زیاتېدل به د نړۍ امنیت ته خطر پېښ کړي او باید په دې اړه خبرې وشي.

دا له هغې وروسته ده چې امریکايي ولسمشر ډونلډ ټرمپ تېره ورځ اعلان وکړ چې له ايران سره د مخ په زياتيدونکي کړکيچ په تناظر کې منځني ختيځ ته ۱۵۰۰ امریکایي عسکر استوي چې هلته خپل پوځي طاقت نور پیاوړی کړي.

خو ولسمشر ټرمپ ټينګار کړی چې د دې ځواکونو کردار به حفاظتي وي.

د ولسمشر ټرمپ تر دې اعلان وروسته د امریکا د بهرنیو چارو وزیر مایک پامپیو په یو بیان کې وویل چې ټرمپ انتظاميه پلان لري چې سعودي عرب ، متحده عرب امارات او اردن ته د ۸.۱ اربو ډالرو وسلې په دې موخه ورکړي چې د ايراني جارحيت مخه ونيسي.

د امریکا او ایران اړیکي له هغې وروسته خرابې شوې چې تېرکال ولسمشر ټرمپ د ایران سره د نړیوالو طاقتونو د ایټمي تړونه د امریکا د وتلو اعلان وکړ.

د اروپايي پارلمان انتخابات روان دي

په اروپا کې په میلیونونو کسان د اروپایي پارلمان د غړیو ټاکلو لپاره رایي اچوي.

لومړنۍ پایلي ښيي چې د ځینو څارونکو د وړاندیونو برعکس ښي اړخو ګوندونو زیاتې رایې نه دي اخیستي.

دا ټاکنې تیره اونۍ پیل شوې چې په لړمړي پړاو کې په برتانیا او هالینډ کې خلکو رایي واچولې او تېره ورځ په ایرلنډ او چک جمهوریت کې خلکو رایې استعمال کړې. د اروپا په دریو نورو هیوادو کې به خلک د مې پر ۲۵مه رایې اچوي.

په اروپا کې د دې انتخاب لپاره شاوخوا ۴۰۰میلیونه کسان د رایې ورکولو جوګه دي چې د اروپایي پارلمان ۷۵۱ غړي انتخاب کړي.

تمه ده چې د اروپایي ټولنې په ټولو ۲۸ هېوادونو کې د انتخاباتو د ترسره کېدو وروسته به لومړنۍ سرکاري نتیجې د مې پر ۲۶ اعلان شي.

د برتانیا وزیر اعظمه خپله دنده پرېږدي

د برتانیا وزیر اعظمې تېرېزا مې ویلي، د راتلونکې میاشتې په اوومه له خپلې دندې استعفا ورکوي.

نوموړې د مې پر ۲۴مه په لندن کې د وزیر اعظم د دفتر مخې ته خبریالانو ته وویل، د نوي وزیر اعظم تر ټاکنې به د عبوري وزیر اعظمې په توګه دنده ترسره کړي.

مې د خپل ګوند کنزرویټیو لخوا په خپل وخت له اروپایي ټولنې د نه وتلو پر سر له فشارونو سره مخامخ وه.

ټاکل شوې چې برتاینا له اروپایي ټولنې د روان کال اکتوبر پر ۳۱ مه ووځي.

خو پارلېمان لا هم له ټولنې د وتلو لپاره شرایط نه دي منظور کړي.

امریکا د ویکيلیکس پر بنسټښود نوي جرمونه لګولی

د ویکي لیکس بنسټ اېښودونکی جولین اسانج. عکس له ارشیفه

د امریکا چارواکو د ویکيلیکس پر بنسټښود جولین اسانج پر نویو جرمونو تورن کړی دی.

پر هغه تور دی چې د زرګونه پټو دستاویزات په خپرولو یې امریکا ته لوی نقصان رسولی و.

د مې پر ۲۳مه پر اسانج له نویو رسمي تورونو سره سم هغه باندې الزام دې چې د امریکا د پوځي استخباراتو یوه پخواني څېړوونکي ته یې ویلي ول چې دغه پټ مواد خپاره کړي.

اسانج دا مهال په لندن کې په حراست کې دی.

هغه په اپریل میاشت کې د ایکواډور سفارت شړلی و چې د کلونو راهیسې هغلته اوسېدو.

امریکا غواړي چې له هېواد دې وویستل شي او ور وسپارل شي.

مرستیال اټارني جنرل په بیان کې وویل چې هېڅ یو ذمه وار فرد یا خبریال به کله هم په ارادي توګه د هغو کسانو یا سرچینو نومونه برسېره نه کړي چې ورته معلومه وي چې هغه پټ دي او څرګندول به یې له خطر سره مخامخ کړي.

څارنوالان وايي د ویکي لیکس لخوا په خپرو شویو موادو کې د هغو کسانو نومونه ول چې په افغانستان او عراق کې یې د امریکايي ځواکونو او سفارتکارانو مرسته کړې وه.

ډان ته اشتهارونه نه ورکول کېږي: د بې پولې خبریالان

عکس له ارشیفه

د بې پولې خبریالانو سازمان ار اېس اېف ویلي چې له تېرې یوې میاشتې راهیسې حکومت پاکستانۍ ډان ورځپاڼې ته اشتهارونه نه ورکوي چې د ادارې په خبره دغه ډاروونکې عمل د دغه اخبار پر ادارتي خپلواکۍ منفي اغېز کوي.

د میډیا څار پاریس مېشتې ادارې د مې پر۲۳مه په بیان کې وویل چې د اپریل ۲۴مې راهیسې د پاکستان د انګریزۍ ژبې معتبره ورځپاڼه له وفاقي حکومته د پیسو له اخیستو او پیسو ګټلو محرومه ده.

د ادارې په خبره چې ډان نیوز ټي وي هم تر فشار لاندې دی او ډارول کېږي.

ار اېس اېف په بیان کې وویل چې د پاکستان په شان هېواد کې د شخصي سیکټور په اشتهارونو ډېرې کمې پیسې ترلاسه کېږي نو په داسې حال کې دغه حکومتي بندیز د میډیا دغه ادارې اقتصادي حالت ته تاوان رسوي.

اداره وايي د اخبار خلاف دغه کاروايي له هغې وروسته شوې ده چې تهران ته د وزیر اعظم عمران خان د سفر په اړه یې د نوموړي هغه بیانونه خپاره کړي وو چې پاکستان مېشت وسله وال پر ایران په حملو کې ککړ دي.

امریکا ښايي منځني ختیځ ته ۵ زره عسکر ولېږي

په افغانستان کې امریکايي ځواکونه. عکس له اریشفه

د امريکا دفاع وزارت منځني ختيځ ته د پنځه زره نورو پوځيانو په لېږلو غور کوي.

دا په داسې حال کې ده چې د امريکا او ايران کړکېچ مخ پر زياتېدو دی.

يو امريکايي چارواکي د مې پر ۲۲مه رويټرز خبري اژانس ته د نوم نه خپرولو په شرط ويلي چې د دغو ځواکونو د لېږلو درخواست د امريکايي ځواکونو مرکزي قوماندانۍ کړی دی.

معلومه نه ده چې د دفاع وزارت به دا درخواست ومني او که نه.

د امريکا او ايران ترمنځ له هغې وروسته اړيکې ډېرې خرابې شوې چې تېر کال ولسمشر ډونلډ ټرمپ له تهران سره د اټومي پروګرام د محدودلو لپاره په ۲۰۱۵م کال کې شوي تړون څخه ووت.

امریکایي طالب جان واکر له جېله خوشې کېږي

امریکایي طالب جان واکر. عکس له ارشیفه

په ۲۰۰۱ کال کې په افغانستان کې نیول شوی، امريکايي جان واکر ليند د مې پر ۲۳مه له جېله خوشې کېږي.

دغه ۳۸ کلن سړی د امريکايي طالب په نامه مشهور دی.

هغه د طالبانو په ملاتړ جنګېده.

جان واکر په کیلیفورنیا کې زیږېدلی وو. د ۱۶کالو په عمر کې مسلمان شو او بیا په ۲۰۰۱م کال کې له طالبانو سره ملګری شو.

نوموړی له هغه سلګونو وسله والو څخه وو چې په ۲۰۰۱ کې امریکايي ځواکونو په افغانستان کې نیولی وو.

هغه ته عدالت د ۲۰ کالو د بند سزا اورولې وه خو د ښه رویې له کبله يې د سزا موده کمه شوې او د مې پر ۲۳مه له انډيانا کې له زندان خوشي کېږي.

خلیلزاد امریکايي سناتورانو ته پر افغان سولې معلومات ورکوي

آرشیف/ د افغانستان د سولې او پخلاینې لپاره د امریکا خاص استازی زلمی خلیلزاد

د افغانستان سولې او پخلاینې لپاره د امریکا خاص استازی زلمی خلیلزاد به د مې پر ۲۲مه د امریکا سنا جرګې بهرنیو اړیکو کمېټې ته د افغان سولې د ټينګښت په هدف د خپلو هڅو په اړه معلومات ورکړي.

د بهرنیو اړیکو کمېټه وايي، د دوی نننۍ ناسته به د تړلو دروازو تر شا وي.

خلیلزاد په شاوخوا اووه میاشتو کې شپږ واره له طالبانو سره د قطر په پلازمینه دوحه کې کتلي دي.

تمه ده چې خلیلزاد امریکايي سناتورانو ته د خپلو دغو لیدنو په اړه معلومات ورکړي.

له افغانستانه د بهرنیو ځواکونو وتل او له افغان خاورې د ترهګرۍ د کار نه اخېستل ډاډ هغه مسایل دي چې خلیلزاد او طالبانو پرې بحثونه کړي، خو خلیلزاد ټینګار کوي چې په افغانستان کې د اوربند ټينګښت او بین الافغاني خبرې یې هم د بحثونو اصلي موضوع ګانې دي.

د خلیلزاد او طالبانو وروستی دور خبرې د مې پر نهمه پای ته ورسېدې.

د افغانستان د سولې او پخلاینې لپاره د امریکا خاص استازی خلیلزاد دا خبرې ښې خو ورو یادې کړي.

طالبانو ویلي چې له افغان حکومت سره مخامخ خبرې نه کوي او دوی ته له افغانستانه د بهرنیو ځواکونو د وتلو مسله مهمه ده.

ایران ډاروو، جنګ نه ورسره کوو: شانهن

د امریکا دفاع سرپرست وزیر پېټرک شانهن.

د امریکا د دفاع سرپرست وزیر ویلي، په وروستیو کې یې پر ایران د دې لپاره فشارونه زیات کړي چې د هغه هېواد مخه ډب کړي.

پېټرک شانهن په کېپیټل هیل کې د تړلو دروازو تر شا د کانګرس غړیو ته وویل ټرمپ انتظامیه له تهران سره د کړکېچ نور زیاتول نه غواړي.

د امریکا دفاع مشر خبریالانو ته وویل، له ایران سره جګړه نه بلکې د هغه هېواد ویرول غواړي.

هغه زیاته کړه، زموږ ټوله توجه د کړکیچ زیاتولو لپاره نه بلکې تهران د غلطیو مخنیوي لپاره ده.

د جرمني چانسلرې انګېلا مېرکل، د فرانس ولسمشر ایمانول مکرون او د روس ولسمشر ولادیمیر پوتین هم په خپلو کې په ټېلېفون غږېدلي دي او د ایران او امریکا ترمنځ په وروستي کړکېچ یې خبرې کړي دي.

د جرمني چانسلرې دفتر د مې پر ۲۱مه ویلي درې واړه مشران له ایران سره د اټومي تړون د جاري ساتلو ملاتړ کوي او پر ایران ټینګار کوي چې تړون پر ځای وساتي.

خیبر پښتونخوا کې ډاکټرانو هړتال پای ته ورساوه

خیبر پښتونخوا کې د ډاکټرانو کاربندیز
تم شئ

هېڅ میډیايي سرچینه اوس نشته

0:00 0:03:16 0:00

په خېبر پښتونخوا کې ډاکټرانو د تېرې یوې اوونۍ راهیسې روان کاربندیز له وزیر اعلا محمود خان سره تر لیدو وروسته ختم کړ.

د خېبر پښتونخوا د اطلاعاتو وزیر شوکت یوسفزي بېګا مشال راډیو ته وویل د ډاکټرانو او صحت وزیر ترمنځ د رامنځته شوې پیښې د پلټنو لپاره کمیټۍ جوړه شوه.

د ډاکټرانو د اتحادیې مشر ډاکټر عالمګیر مشال راډیو ته ویلي، حکومت ورسره ژمنه وکړه چې په روغتونونو کې د نوي نظام پليکولو په لړ کې به له ډاکټرانو سره مشوره کوي.

د خېبر پښتونخوا ډاکټرانو د مې پر۱۴مه د روغتیا وزیر هشام انعام الله او د ډاکټرانو د یو مشر ډاکټرضیا الدین اپرېدي ترمنځ د تاوتریخوالي تر پېښو وروسته په ټوله صوبه کې کاربندیز پېل کړی وو.

د افغانستان په شمال کې داعش وسله وال غونډېږي: روس

د داعش وسله والو ډلې نښه. عکس له ارشیفه

د روس د امنیت فډرالي اداره وايي، د اسلامي دولت ډلې وسله وال د افغانستان په شمالي برخو کې سره را غونډېږي.

دا خبره د یادې ادارې مشر الیګزنډر بورتنیکوف د مې پر ۲۱مه په تاجکستان کې کړې ده چې له افغانستان سره یوه اوږده پوله لري.

هغه ویلي چې دا وسله وال د افغانستان په هغو برخو کې را پورته کېږي چې په منځنۍ اسیا کې د شوروي له پخوانیو غړیو هیوادونو سره پر پوله پرتې دي.

نوموړي زیاته کړې چې دی د افغانستان په شمالي ولایتونو کې د داعش د پنځه زره وسله والو بیا ګمارل کېدو په اړه اندېښنه لري.

د ده په وینا، د هغوی د خپرېدو د مخنیوي لپاره باید پر پوله کلک ګامونه پورته کړل شي.

د امریکا پوځ اټکل کوي چې په افغانستان کې به د داعش ډلې شاوخوا دوه زره وسله وال وي.

د نیو زيلېنډ پر جوماتونو بریدکوونکی په ترهګرۍ تورن شو

د کرایست‌ چرچ ښار. عکس له ارشیفه

د نیو زيلېنډ پولیس وايي، د هېواد په کرایس چرچ ښار کې پر جومات برید کونکی یې په رسمي توګه په ترهګرۍ تورن کړی دی.

پولیسو د مې پر ۲۱مه په یو بیان کې ویلي چې برینټن ټېرنټ ترهګري کړې ده.

د ترهګرۍ د تور تر ټولو سخته سزا ټول عمري بند دی.

د سپین پوستو برتر بلونکی دا کس برینټن ټېرنټ نومېږي او د اسټرالیا وګړی دی.

پر ده وار له مخه په رسمي توګه د ۵۱ کسانو د وژلو او د ۳۹ نورو د وژلو د هڅې تور پورې شوی دی.

۲۸ کلن برینټن ټېرنټ به بیا په جون میاشت کې عدالت ته وړاندې کېږي.

دا برید د نیو زيلېنډ په تاریخ کې تر ټولو لویه ډله ییزه وژنه بلل شوې ده.

بحرین د اسرایلو او فلسطین د جوړ جاړي غونډې کوربه

د بحرین بیرق. عکس له ارشیفه

امریکا به په بحرین کې د هغه نړيوالې غونډې کوربتوب کوي چې پکې به د ولسمشر ټرمپ د اوږدې مودې راهیسې د ځنډ ښکار د اسرایلو او فلسطین د سولې پلان لومړۍ برخه په ډاګه کېږي.

د جون پر ۲۵مه او ۲۶مه په دې غونډه کې به د اسراییل او فلسطین ترمنځ د شخړې ختمولو د اقتصادي ګټو په اړه خبرې کېږي.

د سولې په دې پلان کې د فلسطین په خاوره د لوړې کچې پانګونه او انتظامي جوړښت کارونه شامل دي.

خو د راپورونو له مخې د بحرین په غونډه کې د مهمو سیاسي عناصرو په اړه معلومات مخې ته نه دې راغلي او په غونډه کې به د شخړې په مهمو نکتو لکه د پولو، بیت المقدس حیثیت، فلسطیني کډوال او اسراییل امنیت په اړه بحث نه کېږي.

ولسمشر ټرمپ دا د پیړۍ یوه موافقه بللې ده خو فلسطیني چارواکو د امریکا پر دې هڅو تنقیدونه کړي او ګمان کوي چې دا د امریکا مهم اتحادي اسراییل په حق کې دي.

د خیبر پښتونخوا روغتیايي کارمندانو د ډاکټرانو ملاتړ اعلان کړ

په کوټه کې د ډاکټرانو احتجاج. عکس له ارشیفه

د خېبر پښتونخوا د روغتیا کارکونکو د صحت په محکمه کې د نوي نظام پرضد د ډاکټرانو د ملاتړ اعلان کړی دی.

د مې پر۲۰مه په پېښور پرېس کلب کې تر خبري غونډې وروسته د روغتیا کارکوونکو د ټولنې مشر سید روییدار شاه مشال راډیو ته وویل: " له وزیر ‏اعلا محمود خان سره تر غونډې وروسته د ډاکټرانو تګلاره به نور روغتیايي کارکونکي هم عملي کوي."

د روغتیا کارکونکي او ډاکټران وايي، د صحت محکمې د نوو اصلاحاتو ترمخه به روغتونونه د روغتیا تر ضلعې ادارو لاندې راشي او سرکاري روغتونونه به شخصي شي.

خو حکومت ویلي، داسې کومه اراده نه لري البته د نوی نظام له مخې روغتونونه سمول غواړي.

ملګري ملتونه د امریکا او ایران پر شخړه اندېښمن دی

د ملګرو ملتونو نښه یا لوګو.

ملګرو ملتونو د امریکا او ایران ترمنځ د مخ په زیاتېدونکو متنازعه بیانونو په اړه انديښنه څرګنده کړي او له دواړو یې د ارامه اوسېدو غوښتنه کړې ده.

د واشنګټن او تهران ترمنځ د مخ په زیاتېدونکي ترینګلتیا په حالاتو کې د مې پر۲۰مه امریکايي ولسمشر ډونلډ ټرمپ په ټویټر ولیکل، که ایران جګړه غواړي نو دا به په رسمي توګه د هغه هېواد ختمېدل وي.

د ایران بهرنیو چارو وزیر محمد جواد ظریف د ولسمشر ټرمپ هغه بیان رد کړی چې ظریف د ټولوژنې پېغورونه بللي دي.

نوموړي امریکا ته خبرداری ورکړ چې ایران ته دې دړکي نه ورکوي.

د ملګرو ملتونو ویاند سټیفن دوجاریک وویل، دوی د امریکا او ایران د یو بل پرضد بیانونو په اړه اندېښمن دي.

نوموړي زیاته کړه، د مې پر ۱۹مه د ویشتل شوې هغه توغندي په اړه هم اندېښنې لري چې په بغداد کې د بهرنیو هېوادونو سفارتخانو په سیمه کې د امریکا له سفارتخانې سره په ۵۰۰ میټره واټڼ کې لګیدلی دی.

د اوکراین نوي ولسمشر ولادیمیر زېلېنسکي پارلېمان ړنګ کړ

د اوکراین نوي ولسمشر ولادیمیر زېلېنسکي

د اوکراین نوي ولسمشر ولادیمیر زېلېنسکي د مې پر ۲۰مه د خپلې دندې تر لوړې وروسته د هېواد پارلېمان ړنګولو اعلان وکړ.

له دې اقدام سره دی غواړي چې تر وخت مخکې د انتخاباتو په کولو، په پارلېمان کې زیات واک ولري.

زېلېنسکي وویل، په ختیځ اوکراین کې د هېوادوالو د وژنو مخنیوي لپاره ټول اقدامات کوي: ''زموږ لومړنی کار به دا وي چې په دونباس کې اوربند وکړو.''

ټوکمار اداکار زېلېنسکي د اپرېل پر ۲۱مه د ولسمشریزو انتخاباتو په دوهم پړاو کې خپل مخالف نوماند او پخواني ولسمشر پېترو پروشېنکو ته ماته ورکړه.

سعودي د ملګرو هیوادونو سرمشریزې بللي

د سعودي باچا سلمان

سعودي عرب په روانه مياشت کې د خپلو ملګرو هېوادونو دوه بیړنۍ غونډې غوښتي څو د تېلو په تنصيباتو د حملو او په سيمه کې له ايران سره د تاوتريخوالي په اړه خبرې وکړي.

د سعودي عرب بادشاه سلمان د مې پر ۱۸ د خلیج د همکارۍ د شورا او د عرب لیګ پر مشرانو غږ وکړ چې د مې پر ۳۰ دې په بیړنیو سر مشریزو کې ګډون وکړي.

سعودي او نورو چارواکو ویلي چې په سرمشريزو کې به د متحده عربي اماراتو په ساحلي سيمه کې په څلورو سوداګریزو بحري جهازونو برید او د ریاض سره نږدې د تېلو د تولیداتو په ساحو کې د بې پیلوټه الوتکو بریدونو په اړه بحث وشي. ایران پر دغو جهازونو د بريدونو تورونه رد کړي دي.

د سعودي عرب سرکاري خبري اژانس SPA د بهرنیو چارو وزارت یوه چارواکي په حواله ویلي چې د غونډې مشران به د بریدونو او په سیمه کې دې ته د غبرګونونه په اړه خبرې وکړي.

اردغان وايي هرو مرو له روسیې دفاعي نظام اخلي

د ترکي ولسمشر رجب طیب اردغان

د ترکیې ولسمشر رجب طیب اردغان يو وارې بيا له روسیې څخه د دفاعي نظام اخېستو خبره تکرار کړې او ويلي يې دي چې له مسکو نه به په راتلونکي کې هم ورته دفاعي پروګرامونه اخلي.

اردغان د مې پر ۱۸ په استنبول کې د پوهنتون زدکونکو ته د وینا پر مهال وويل چې له روسیې څخه د S-400 دفاعي نظام اخېستو نه به په هېڅ صورت کې په شا نه شي.

نوموړي زیاته کړه چې د S-400 وروسته به د S-500 دفاعي نظام هم اخلي.

د ترکيې ولسمشر دا څرګندونې په داسي حال کې کړي چې د امريکا د ولسمشر ډونلډ ټرمپ ادارې او کانګرس پر ترکیې غږ کړی چې له روسیې څخه د پلان شوي دفاعي نظام له اخېستو ډډه وکړي.

ایران درې لیکوالانو ته د شپږو کلونو بند سزا اورولې

عکس له ارشیفه.

په ایران کې یو عدالت درې لیکوالان د ملي امنیت خلاف د فعالیتونو په جرم کې په اجتماعي ډول پر۱۸کلونو بند محکوم کړي دي.

راپورونه وايي، دا درې لیکوالان رضا خندان مهابادي، بکتاش ابتین او کیان بجان نومېږي او تېره اوونۍ هر یو ته د شپږو کلونو سزا اورول شوې ده.

د راپورونو پر اساس د دغو درېو واړو لیکوالانو خلاف د اپریل د میاشتې په وروستیو کې عدالتي کاروايي شوې وه.

درېواړه لیکوالان د ایران د لیکوالو د ټولنې غړي دي.

دغې ټولنې په یو بیان کې ویلي، دا د هغو ټولو لیکوالو خلاف یو ګام دی چې غواړي د بیان له ازادۍ ګټه پورته کړي.

دغه ټولنه وايي، حکومت د یادو لیکوالو خلاف کره شواهد نه دي وړاندې کړي.

پکتیکا: ډرون برید درې مشکوک وسله وال وژلي

د ډرون الوتکې عکس (ارشيف)

د افغانستان د پکتیکا امنیتي چارواکي وايي چې مې پر۱۸مه سهار شاوخوا لس بجې د پکتیکا ولایت د برمل ولسوالۍ په سیمو کې د بې پیلوټه الوتکې په یو برید کې درې وسله وال وژل شوي او درې نور ټپي شوي دي.

د پکتیکا د امنیه قوماندان ویاند شاه محمود ارین مشال راډیو ته وویل چې په دې برید کې د وسله والو طالبانو یو موټر په نښه شوی او وسله والو ته په کې یاده مرګ ژوبله اوښتې ده.

ارین زیاته کړه: "نن سهار شاوخوا ۱۰ بجې د پکتیکا ولایت د برمل ولسوالۍ د باقرخېلو په سیمه کې هوايي برید ترسره شوی چې په نتیجه کې يې شپږ تنو وسله والو ته مرګ ژوبله اوښتې ده، چې درې تنه وژل شوي او درې تنه يې ټپیان دي، همدا ډول د هغوی کرولا موټر او کومې وسلې چې يې درلودې بیخي تخریب شوي او له منځه تللي دي."

د پکتیکا د امنیه قوماندانی ویاند زیاته کړه، چې په دې برید کې ولسي وګړو ته زیان نه دی اوښتی.

د یادو برید په اړه وسله والو ډلې څه نه دي ویلي.

جواد ظریف: چین ، روس او نور دې د ایټمي تړون دفاع وکړي

جواد ظریف

د ایران د بهرنیو چارو وزیر جواد ظریف پر چین ، روس او نورو "شریکانو "ږغ کړی چې په ۲۰۱۵م کال کې د شوي ایټمي تړون د دفاع لپاره کلک ګامونه پورته کړي.

جواد ظریف دا څرګندونې د مې پر ۱۷مه په بیجینګ کې له خپل چیني سیال ونک یي سره د لیدو کتو پر مهال کړې دي.

دا په داسې حال کې ده چې د ایران او د نړۍ د ځواکمنو هیوادونو ترمنځ له ایټمي تړون څخه د امریکا د وتلو یو کال پوره شوی دی.

امریکايي ولسمشر ډونلډ ټرمپ نه یوازې خپل هیواد له دې تړون څخه ایستلی بلکې پر ایران یې نرم شوي او لرې شوي بندیزونه بیرته لګولي دي.

امریکا پر ایران تور پورې کوي چې نه یوازې خپل ایټمي پروګرام پراخوي بلکې په سیمه کې د سخت دریځو او ترهګرو ډلو ملاتړ هم کوي خو ایران یې نه مني.

ایران بیا پر امریکا تور پورې کړی چې په سیمه کې په غیر ضروري ډول، کړکیچ زیاتوي.

د خبریال شاه زېب جیلاني خلاف مقدمه ختمه شوه

پاکستانی خبريال شاه زېب جېلاني. عکس له ارشیفه

د پاکستان د کراچۍ یو عدالت، د مې پر ۱۸مه د خبریال شاه زېب جیلاني پرضد پاکستاني ادارو ته د سپکاوي کولو او د سایبر یا انټرنیټي ترهګرۍ دوسیه ختمه کړله.

عدالت ویلي، د پاکستان فیډرالي پلټونکې اداره « اېف آی ای» د نوموړي خلاف د کافي ثبوتونو په وړاندې کولو کې پاتې راغلې ده.

قاضي په خپله پرېکړه کې وویل چې د خبریال شاه زېب جیلاني خلاف درج شوې پرچه یا اېف آی ار اوس برقرار نشي پاتې کېدای.

دغه قضیه اوس د شواهدو د کموالي پر بنسټ تړل شوې ده.

شازېب جیلاني چې له بي بي سي او له المان راډیو سره همکار پاتې شوی اوسمهال په پاکستان کې د دنیا نیوز په نوم یو اردو ژبي تلویزون سره پر کار بوخت دی.

تر دې وړاندې، د بې پولې خبريالانو سازمان د شاه زېب جېلاني خلاف د لګول شويو تورونو غندنه کړې وه.

شاه زېب جیلاني چې پر ضمانت خوشي شوی وو، بې پولو خبریالانو ادارې ته یې ویلي وو، د ده پرضد د مقدمې اصلي وجه هغه رپورټ دی چې ده د ورک کړل شویو کسانو په اړه جوړ کړی وو.

خلیلزاد: سوله د افغانستان د ولسمشرۍ ټاکنو مخه نه نیسي

زلمی خلیل‌زاد

د افغانستان د سولې لپاره د امریکا ځانګړی استازی زلمی خلیلزاد وایي، د سولې پروسې ته لومړیتوب ورکوي چې په افغانستان کې سیاسي جوړجاړي ته لار هواره کړي.

زلمي خلیلزاد دا خبره پر ټوېټر د هغه ځواب په وړاندې لیکلې ده چې یو شمېر کتونکو په وروستیو کې وویل چې امریکا په افغانستان کې انتخاباتو ته لومړیتوب ورکوي.

خلیلزاد وایي، سوله د افغانستان د ولسمشرۍ د ټاکنو مخه نه نیسي.

خلیلزاد زیاته کړې چې د سولې له هڅو سره سره باید د انتخاباتو هلې ځلې هم روانې وي.

د افغانستان د انتخاباتو خپلواک کمېسیون د روان کال د سپټمبر ۲۸مه د ولسمشرۍ د انتخاباتو لپاره ټاکلې ده.

د سیاسي ګوندونو ملي ایتلاف د مې پر ۱۷مه وویل چې تر سولې مخکې د دې انتخاباتو ترسره کېدل به په هېواد کې کړکېچ رامنځته کړي.

هلمند کې هوايي برید په تېروتنه ۹ پولیس وژلي

نقشه له ارشیفه

افغان چارواکي وايي چې د دې هېواد په هلمند ولايت کې له وسله والو طالبانو سره د جګړې پر مهال په يو هوايي بريد کې په تېروتنه سره د يوه افغان کومندان په ګډون نهه پوليس وژل شوي دی.

چارواکي زياتوي د دې ولايت په نهر سراج ولسوالۍ کې د بريد پر مهال ۱۴ پوليس ژوبل شوي هم دي. د هلمند والي محمد ياسين ويلي چې د دې پېښې پلټنې روانې دي. د والي وياند عمر ځواک نن مشال راډيو ته وويل چې دا هوايي بريد بهرنيو ځواکونو هغه وخت وکړ کله چې دوی له سيمې څخه وسله وال طالبان اېستل.

په افغانستان کې د ناټو په مشرۍ د قاطع ملاتړ ماموريت نن ويلي چې د پېښې په اړه پلټنې کوي.

وسله والو طالبانو په داسې حال کې پر افغان او بهرنيو ځواکونو خپلو بريدونو ته دوام ورکړی چې په قطر کې يې له امريکايي چارواکو سره د سولې د خبرو څو پړاوونه تر سره کړل.

ښايي ترکيه د روسيې توغندیز دفاعي سيسټم وانخلي

د امريکا د هوايي ځواک وزيره هيدر ويلسن

د امريکا د حکومت يوه وزيره وايي، لا هم امکان شته چې ترکيه د روسيې د توغندیو دفاعي سيسټم له پېرلو ډډه وکړي.

له مسکو د دې دفاعي سيسټم د رانيولو موافقې واشنګټن او د ناټو ګڼ متحدان په غوسه کړي دي.

د امريکا د هوايي ځواک له وزيرې هيدر ويلسن «Heather Wilson» پوښتنه وشوه:

"ایا امکان لري چې انقره د ميزايلو د «S-400» ډوله دفاعي سيسټم د پیرلو په برخه کې خپل نظر کاملاً بدل کړي؟"

وېلسن د مې پر ۱۶مه وويل: "دا احتمال شته."

هغې په خپلو خبرو کې وويل چې پر دې موضوع ډيپلوماتان خپل کار ته دوام ورکوي.

د امريکا د هوايي ځواک وزيرې د امريکا پخوانۍ خبره تکرار کړله، هغه دا چې د روسيې دغه دفاعي سيسټم د امريکا ساخت له «F-35» ډوله جنګي الوتکو سره اړخ نه لګوي.

د امريکا متحدو ايالاتونو له انقرې غوښتنه کړې د روسيې د دفاعي سيسټم د رانيولو له موافقې شاته شي.

په عين حال کې د ناټو متحدانو هم د امريکا ساخت «F-35» ډوله جنګي الوتکو ته د ورپېښ بالقوه ګواښ په اړه اندېښنه ښوولې ده.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG