د ننګرهار د پولیسو چارواکي وایي چې د هسکې مېنې ولسوالۍ په یاغي بند سیمه کې د داعش وسله والې ډلې د امربالمعروف مسوول منور چې د لغمان ولایت د الینګار ولسوالۍ اوسېدونکی دی، له دوه نورو ملګرو سره یو ځای نیول شوی دی.
د ننګرهار د امنیه قوماندانۍ مطبوعاتي مسوول حضرت حسېن مشرقیوال د سېشنې په ورځ مشال راډیو ته وویل چې نیول شوي کس د ښځو بورقه اچولې وه، چې د یادې ولسوالۍ پولیسو د پلټنو پر مهال تشخیص کړی او ورسره دوه تنه ملګري یې هم نیولي دي.
مشرقیوال زیاتوي چې نیول شوي کسان په امنیه قوماندانۍ کې تر پوښتنو او څېړنو لاندې دي.
