د لاسرسي ځای

تازه خبر

پاکستان پوليو ضد بېړنی پلان منظور کړ


په پېښور کې يوې ماشومي ته پوليو واکسين ورکول کيږي.
په پېښور کې يوې ماشومي ته پوليو واکسين ورکول کيږي.

د پاکستان حکومت د پوليو ويروس د مخنيوي لپاره د درې کلن پلان منظوري ورکړې ده.

د پاکستان سرکاري راډيو پر خپله ويب پاڼه ليکي چې د جمعه په ورځ د ماليې وزير اسحاق ډار په مشرۍ کې د اقتصادي پروژو منظورونکې شوری، ايګزېکټيو کميټې اف اکونومک کونسل په غونډه کې منظوري ورکړل شوه.

د پوليو له منځه وړلو بېړني پلان تر نوم لاندي ددې پروژي له مخي به تر ۲۰۱۸ ميلادي کاله پوري د ټول پاکستان هغو ماشومانو ته چې د پوليو په رنځ د اخته کېدو له خطر سره مخامخ دي په ټوليزه توګه څه کم اوه سوه مليونه ځله واکسين ورکول کيږي.

پر دې بېړني پلان به شاوخوا ۳۲ اربه روپۍ خرڅه راځي. د پاکستان پوليو مخنيوي ادارې نېشنل اېمر جنسي اپرېشن سنټر مشر ډاکټر رانا صفدر ويلي،ددې ناروغۍ ويروس د خپرېدو په اړه راتلونکې څلور مياشتي زياتې مهمې دي.

ددې ادارې پر ويبپاڼه ويل شوي چې ډاکټر صفدر دغه خبره د جمعه په ورځ په اسلام اباد کې د پوليو په اړه تکنيکي شوری غونډې ته وکړه. ده زياته کړه چې په ۲۰۱۵ ميلادي کال کې د پوليو په ناروغانو کې ۸۰ فيصده کمۍ راغلی وو.

د مشال ځانګړې پاڼې

XS
SM
MD
LG