د لاسرسي ځای

تازه خبر

خبرونه

“جرمني ته هره ورځ تر ۲۰۰۰ افغان کډوال اوړي”

د جرمني حکومت وايي د افغان کډوالو ورتګ زیات شوی او هره ورځ د دوو زرو په شاوخوا کې افغانان دې هېواد ته د پنا اخیستو لپاره ور رسېږي.

د جرمني د کورنیو چارو وزیر توماس ډی مایزییر د پنجشنبې پر ورځ ویلي دي چې د اکټوبر په میاشت کې یو ۳۱ زره افغان کډوال په غیرې قانوني لارو ور رسیدلي دي.

د ده په وینا، د افغان کډوالو ورتګ اندېښمن کړي او غواړي چې مخه یې ونیسي.

هغه شمیرې چې د جرمني حکومت د جمعې پر ورځ خپرې کړې څرګندوي چې د جنورۍ څخه د اکټوبر تر میاشتې پورې دې هېواد ته ۷۵۸ زره شامي، افغان او عراقي کډوال ورغلي دي.

تر دې مخکې د جرمني د کورنیو چارو وزیر ویلي و، په دې شمیر د افغانانو ورتګ د دوی لپاره د منلو وړ نه دی او د متوسطې طبقې افغانان باید په خپل هېواد کې پاتې شي.

د نننۍ ورځې ټول خبرونه وګورئ

د دښمن پر وړاندې باید متحد شو: روحاني

د ایران ولسمشر حسن روحاني

د ايران ولسمشر د نوي لمريز کال نوروز په مناسبت په خپل پيغام کې په هېواد کې دننه پر سياسي ډلو غږ کړي چې خپل منځني اختلافات ختم کړي او د ده په وینا د بهرنيو دښمانانو پر وړاندي متحد شي.

د ايران سرکاري ټيلي وژن د مارچ پر ۲۱مه د نوروز په مناسبت د ولسمشر روحاني وينا خپره کړه.

ولسمشر روحاني دا څرګندوني په داسي حال کې کړې دي چې د امريکا ولسمشر ډونلډ ټرمپ د ۲۰۱۵ز کال له اټومي ټرونه تر وتلو وروسته پر ایران بندیزونه بیا ولګول د کوم له کبله چې پر ولسشمر حسن روحاني فشار زیات شوی دی.

ولسمشر روحاني په خپلو خبرو کې د اټومې تړون دفاع وکړه خو په ايران کې دننه ځيني ډلې دا لانجمن ګڼي.

بلخوا د ايران ستر مذهبي مشر ايت الله علي خامنايي د نوروز په مناسبت په خپل پيغام کې ويلي دي چې دوي د امريکايي بنديزونو پر وړاندي په کاميابي سره ولاړ دي.

ایران په منځني ختیځ کې بې ثباتي رامنځته کوي: پابلیټ

د امریکا د وسلو مخنیوي ادارې مرستیال سیکترې یلیم پابلیټ.

د امریکا د وسلو مخنیوي ادارې مرستیال سیکترې یلیم پابلیټ ویلي، د ایران د میزایلو پروګرام په منځني ختیځ کې بې ثباتې رامنځته کوي او په سیمه کې د وسلو د سیالۍ ګواښونه زیاتوي.

نوموړې دا خبره د مارچ پر۲۰مه په جینوا کې د وسلو مخنیوي لپاره د ملګرو ملتونو په ملاتړ جوړې شوې یوې غونډي ته وکړه.

پابلیټ زیاته کړه، ایران باید په سمدستي توګه د اټومي وسلو د وړولو صلاحیت لرونکیو بیلاسټک میزایلو سره تړلې فعالیتونه پرېږدي او د وسله والو ډلو او د غیر ریاستي عناصرو لپاره د میزایلو جوړولو ټیکنالوجي دې بنده کړي.

نوموړې پر ایران تور پورې کړ چې دا هېواد په یمن کې د حوثي یاغیانو او په لبنان کې د حذب الله ډلې ملاتړ کوي.

ایران بیا وايي، اټومي پروګرام یې د خپلي دفاع لپاره دی.

'طالبانو له اوو برمته هندي انجنیرانو یو خوشې کړی'

د بغلان نقشه.

په افغانستان کې ۲۰۱۸م کال د طالبانو له خوا د تښتول شویو اووه هندي انجنیرانو له ډلې یو يې خوشې شوی او خپل هېواد ته ستون شوی دی.

دا خبره د هند د بهرنیو چارو وزارت د مارچ پر ۱۹مه وکړه.

هندي انجنیران د تېرې مې میاشتې پر شپږمه په بغلان کې تښتول شوي وو.

د هند د بهرنیو چارو وزارت په یوه بیان کې د دې هندي انجنیر د خوشې کېدو له امله د افغان د حکومت له هڅو مننه کړې ده.

خو په بیان کې دا نه دي ویل شوي چې دا انجنیر دقیقاً کله او څه ډول خوشې شوی دی.

دغه اووه هندي انجینیران او د هغوی افغان ډرېور د افغانستان د بغلان ولایت د خواجه الوان په سیمه کې هغه مهال وتښتول شول چې غوښتل‌ یې په سیمه کې یو وړوکی برېښناکوټ د (بجلۍ سب سټېشن) وګوري.

د معلوماتو له مخې په دغه شرکت کې ۱۵۰ هندي انجینیران کار کوي.

دا مهال شاوخوا ۱۷ سوه هندي انجنیران او تخنیکي کارپوهان په افغانستان کې د بیارغونې په پروژو کې کار کوي.

هالېنډ کې د برید په تړاو دوه نور مشکوک کسان نیول شوي

د هالنډ پولیس

د مارچ پر نولسمه د هالېند رسنیو ویلي چې پولیسو په دغه هېواد کې په دوشنبه د ډزو له پېښې وروسته دوه نور مشکوک کسان نیولي دي.

د هالنډ په اوترخت ښار کې د دوشنبې په ورځ پر یوه ټرموای د ډزو په پرونۍ پېښه کې درې تنه وژل شوي او پنځه نور ټپیان دي.

پولیسو په اتلسمه مارچ وویل چې له پېښې وروسته يې یو ۳۷ کلن مشکوک کس چې ګاکمن تانیس نومېږي، نیولی دی.

په هالېنډ کې د پروني وسله وال برید انګېزه لا تراوسه نه ده معلومه.

تر دغې پېښې وروسته په دې ښار کې ښوونځي تړل شوي او په هوایي ډګر او نورو مهمو ځایونو کې کلک امنیتي تدابیر نیول شوي دي.

دا پېښه څو ورځې وروسته له هغې کېږي چې په نیوزیلنډ کې د تېرې جمعې په ورځ پر دوو جوماتونو د ډله ییزې وژنې په پېښو کې پنځوس تنه مړه او له څلوېښتو زیات ټپیان شول.

قبایلي سیمې به زر پرمختګ وویني: عمران خان

په هوايي بمباریو کې وران ویجاړ د میرلي بازار. ۲۰۱۴ کال تصویر له ارشیفه

د پاکستان وزیراعظم وايي له خپلې ژمنې سره سمبه په پخوانۍ فاټا کې پرمختیايي چارې پیلوي. عمران خان ویلي، په قبایلي ضلعو کې د لس کلن پرمختیايي پلان په اړه یو درې اونیزه مشوراتي بهیر پیل کړی. نوموړي پر خپل ټویټر کښلي، دا پروسه به لومړی له باجوړه پیلوي.

وزیراعظم عمران خان زیاته کړه، قبایلي ولس به په سیمه کې یو لوی پرمختګ وویني ځکه چې حکومت به په هغو سیمو کې د لس کلن پرمختیايي پلان په ترڅ کې هر کال لس اربه روپۍ لګوي.

که څه هم حکومتونه په پخوانۍ فاټا کې بیا بیا د پرمختیايي چارو ژمنې او غورې کوي خو د قبایلي ولس په وینا تر اوسه یې په سیمه کې د پرمختګ او ترقۍ هېڅ چارې نه ترسترګو کېږي.

کونړ: د ملي امنیت یو چارواکی په هدفي برید کې وژل شوی

د کونړ ولایت مرکز اسعد اباد

د کونړ چارواکي وايي چې د دغه ولایت د ملي امنیت مدیر د دوشنبې ګهیځ په اسعداباد کې وژل شوی دی.

د کونړ د والي ویاند عبدالغني مصمم نن د مارچ پر ۱۸مه نېټه ازادي راډیو ته وویل چې مدیر شفیع الله سهار مهال له خپل کوره دفتر ته روان و چې ناپېژاندو وسله والو وواژه.

تر اوسه د پېښې ذمه واري چا نه ده منلې.

د پېښې پرضد د کونړ په مرکز اسعداباد کې لاریون هم شوی دى.

افغانستان له ایرلېنډه ټېسټ لوبه په اوو ويکټو وګټله

دا د افغانستان د کرکټ په تاريخ کې اول وار دى چې په ټيسټ لوبه کې ایرلېنډ ته په اوو ويکټو ماته ورکوي.

د هند په درادون ښار کې دغه پنځه ورځنۍ لوبې تېره جمعه پيل شوه چې په پای کې یې بری د افغان کرکټ ملي لوبډلې په برخه ورسېدلو.

د کرکټ بورډ مطبوعاتي مسول فريد هوتک په دوشنبه ازادي راډيو ته وويل:

"ايرلېنډ او افغانستان پر يوه ځاى د کرکټ نړيوالې شورا بشپړ غړيتوب ترلاسه کړى دى. له نېکه مرغه چې د افغانستان په کوربه‌توب دغه ټيسټ لوبه افغانستان په لوى توپير وګټله او ويې کړاى شول په تاريخ کې دغه ريکارډ ثبت کړي."

افغانستان په ۲۰۱۸ ز کال د کرکټ نړيوالې شورا بشپړ غړيتوب ترلاسه کړ او اوس کولاى شي په ټيسټ سیالیو کې برخه واخلي.

افغانستان خپله لومړۍ ټيسټ لوبه د ۲۰۱۸ ز کال په جون کې پر هند بايللې وه.

اروپايي ټولنې د کریمیا پر سر بیا پر کرېملېن تنقید وکړ

د اروپايي ټولنې د بهرنۍ پالیسۍ مشرې فېدرېکا موګیرني د کریمیا د نیولو او په غیر قانوني توګه د دې سیمې له روسیې سره د یو ځای کولو د پینځو کلونو پوره کېدو په مناسبت پر کرېملېن تنقید کړی دی.

نوموړې د مارچ پر ۱۷مه، په یو بیان کې ویلي، اروپايي ټولنه اوس هم د اوکراین د خپلواکۍ او د استحکام لپاره په کړو ژمنو ولاړه ده.

موګیرني زیاته کړه، اروپايي ټولنه پر دې ټینګار کوي چې کله به کریمیا د روسیې برخه تسلیم نه کړي او په دې برخه کې د نړیوال قانون د خلاف ورزۍ غندنه کوي.

نوموړې دا هم وویل، اروپايي ټولنه به کله هم د اوکراین د کریمیا سیمې انتخابات و نه مني.

فرانسه کې احتجاج کونکو یو بانک سوځلی

یو کس د ورځپاڼو د خرڅلاو د سوځېدلې هټۍ ترڅنګ روان دی.

د فرانسې په سرښار پاریس کې زیړ واسکټو احتجاج کونکو یو بانک ته اور ورته کړی او ځېنو دکانونو ته یې هم زیان رسولی دی.

په یاد ښار کې تر څو اوونیو وروسته یو وارې بیا د زیړ واسکټو په احتجاجونو کې تاوتریخوالی مخې ته راغلی دی.

د فرانسې ولسمشر ایمانول میکرون د مارچ پر ۱۶مه، د دې بحران په اړه په یوې بیړنۍ غونډه کې ګډون وکړ. له چارواکو سره تر خبرو وروسته ولسمشر وویل، د نور تشدد د مخنیوي لپاره به سختې فیصلي کوي.

په فرانسه کې دا ۱۸م ځل دی چې د اوونۍ په پای کې احتجاجونه کېږي خو په ورستیو څو اوونیو کې د احتجاج کونکو شمېر او تشدد کم شوی وو. دا احتجاجونه د تیلو د بیې د لوړېدو او د ولسمشر ایمانول مېکرون دحکومت ضد کېږي.

نيوزيلېنډ بريد کې شپږ پاکستانيان وژل شوي او درې لادرکه دي

نيوزيلېنډ کې بريد

پراګ - د پاکستان د بهرنیو چارو وزارت د نیوزیلېنډ د کرایسټچرچ ښار دوو جوماتونو باندې د ډزو له پېښې وروسته د نهو پاکستانيانو نوملړ خپور کړی چې شپږ يې وژل شوي او درې لا درکه دي.

د پاکستان د بهرنیو چارو وزارت ویاند ډاکټر محمد فیصل نن (شنبه) پر خپله ټويټر پاڼه دغه نوملړ خپور کړ.

نوموړي پر ټویټر پاڼه په بیان کې ویلي چې په نیوزیلېڼد کې د دوی سفارت د نورو معلوماتو د تصدیق لپاره کار کوي.

د وزارت لخوا پرون په جاري شوې خبرپاڼه کې وویل شو چې پاکستان د جمعې پر ورځ د کرایسټچرچ ښار پر دوو جوماتونو د ډزو پېښه په سختو ټکو غندي. په دې پېښه کې ۴۹ کسان وژل شوي او لسګونه نور ژوبل شوي ول. د پېښې يو مشکوک بريدګر نن (خالي) عدالت ته وړاندې کړل شو او په رسمي توګه تورن وګرځول شو.

د نيوزيلېنډ پر جوماتونو مشکوک بريدګر عدالت ته وړاندې کړل شو

برنټن ټېرنټ عدالت ته وړاندې کېږي

پراګ - هغه ۲۸ ويشت کلن اسټرالوی کس چې ګمان کېږي پرون [د مارچ ۱۵مه] يې د نيوزيلېنډ په کرايسټچرچ ښار کې پر دوو جوماتونو د بريد پر مهال ۴۹ کسان وژلي وو، نن [د مارچ ۱۶مه] عدالت ته وړاندې کړل شو.

عدالت ته د وړاندې کېدو پر مهال برنټن ټېرنټ ته هتکړۍ اچول شوي وې او د بنديانو سپينې جامې يې اغوستې وې. کله چې د نوموړي پر ضد تورونه اورول کېدل نو هغه هیڅ غبرګون ونه ښود.

پر ټېرنټ باندې په دې لومړۍ عدالتي اورېدنه کې د يو کس د وژنې رسمي تور پورې شو خو د عدالت قاضي وويل چې په نورو وژنو به يې هم تورنوي.

دغه مشکوک کس د ضمانت لپاره عدالت ته هيڅ خواست ونه کړ. عدالت امر وکړ چې د دې مقدمې تر بلې اوريدنې پورې چې د اپرېل پر پنځمه به کيږي ټېرنټ دې د پوليسو په ولکه کې وساتل شي.

مظاهرچيانو د خېبر درې لاره تړلې ده

خېبر (ارشيف)

پراګ - د خېبر پښتونخوا د خېبر قبايلي ضلعې په کټه کشته سیمه کې د لويو لارو د قامي ادارې (اېن اېچ اې) لخوا جوړې شوې ټول پلازه باندې افغانستان ته مال وړونکو ګاډو څخه ټیکس يا ماليه اخیستل بیا پیل شوي دي چې په غبرګون کې يې د خېبر ټرانسپورټرانو احتجاج پیل کړی او د خېبر درې لاره یې نن [شنبه] د هر ډول تګ راتګ لپاره تړلې ده.

دغه ټول پلازه د تېر کال [۲۰۱۸م] په ډېسېمبر کې جوړه شوې وه چې د ځایي ټرانسپوټرانو پر احتجاج او غوښتنې ټيکس اخیستل ورباندې بند شوي وو خو اوس بيا ورباندې پېل شو.

ټرانسپوټران وایې دغه ټول پلازه غېرقانوني ده او د خېبر پښتونخوا ګورنر ورته ویلي و چې کله فاټا په خېبر پختونخوا کې ورګډه شي نو هلته به تر پینځو کلونو پورې حکومت ټېکسونه نه اخلي خو د دې پریکړې سرغړونه روانه ده.

بلخوا د این ایچ ایې ټیکه دارانو دعوه کړې چې دوي ته اوس رسمي اجازه ورکړل شوې ده او یوازې له لویو ګاډو دغه ټېکس اخلي او له وړو ګاډو يې نه اخلي. د دوي په وينا د دې په بدل کې به پر دغو لویو لارو باندې د بيارغونې کارونه کوي.

بل پلو د ځایي انتظامي چارواکو او ټرانسپورټرانو ترمنځ د پېښور او تورخم لارې خلاصولو لپاره خبرې اترې روانې دي.

د ای اېس ای یوه پخواني چارواکي اسد منیر 'ځانوژنه' کړې 

د پاکستان استخباراتي ادارې د خېبر پښتونخوا پخوانی مشر او څېړونکی اسد منیر ومړ. پاکستانۍ رسنۍ د اسلام اباد سيکرېټرېټ تاڼې د چارواکیو له خولې وايي چې دا د ځانوژنې پېښه ده او د خودکشۍ تر مادې لاندې به مقدمه درجوي. د اسد منیر د مړینې خبر د هغه لور مینې ګبینې پر خپل ټویټر ورکړی وو.

اسد منیر په تېر وخت کې د پاکستان د استخباراتي ادارو ای اېس ای او اېم ای کې پر لوړو چوکیو کار کړی دی. نوموړی له کورناستې یا متقاعدېدو وروسته د دفاعي او سیاسي چارو څیړونکی و. هغه په ټولینزه رسنۍ ټویټر هم ډېر فعال و چې ډېر مینه وال یې لرل. د اسد منیر د ناڅاپي مړینې د لاملونو په اړه د هغه کورنۍ لا هم څه نه دي ویلي.

عمران خان په باجوړ کې به انټرنیټ بحالولو ژمنه وکړه

د پاکستان وزیر اعظم عمران خان

د پاکستان وزیراعظم عمران خان د قبایلي ضلعو په دوره د مارچ پر ۱۵مه باجوړ ته تللی دی.

نوموړي په باجوړ سپورټس کمپلکس کې جلسې ته وینا وکړه او ویې ویل قبایلي ضلعو د بدامنۍ په وخت کې زیات زیانونه اوښتي او د دې د پوره کولو لپاره به هغو ضلعو ته د اېن اېف سي ایوارډ درېمه برخه ورکوي.

نوموړي په باجوړ کې د انټرنیټ بحالولو ژمنه هم وکړه. باجوړ ته د رسېدو پر مهال په ضلع کې سخت امنیتي اقدامات شوي ول.

له وزیراعظمېدو پس دا د عمران خان قبایلي ضلعو ته لومړۍ دوره ده.

ټاکل شوې چې عمران به د جمعې په ورځ د مومندو دوره هم وکړي.

جلال اباد کې چاودنو شپږ تنه ټپیان کړي

د ننګرهار چارواکي وایي چې د پنجشنې په ورځ شاوخوا شپږ بجې د جلال اباد ښار لومړۍ ناحیې اړوند فوټبال لوبغالي ته څېرمه درې پرله پسې چاودنو شپږ تنه ټپیان کړي دي.

د ننګرهار ولایت مطبوعاتي مسوول عطاالله خوږیاڼي وایي چې لومړۍ چاودنه د سرک د غاړې ګلدان کې له اېښودلي ماینه شوې چې زیان لري، دوهمه چاودنه امنیتي ځواکونو ځای پر ځای شوي ماین ته ورکړې چې یو تن پکې ټپي شوې او درېمه هغه په یوه ریکشه کې له اېښودلي ماینه شوې چې پینځه تنه یې ټپیان کړي دي.

د سادو چاودنو مسوولیت تر دې دمه چا نه دی منلی.

ډاکټر اولیا جان وزیر اجرتي قاتلانو وژلی: پولیس چارواکی

د کوهاټ ځايي پولیس، په دغه ښارګوټي کې د مارچ پر ۱۳مه د سترګو ډاکټر پروفیسر اولیا جان وزیر وژنه د شخصي دښمنۍ پېښه وبلله.

ډي پي او کیپټن واحد محمودپه په چارشنبه ناوخته مشال راډیو ته وویل، د وژنې په تور یې دوه کسان نیولي چې د خپل جرم اعتراف یې کړی او ویلي یې دي چې دوی اجرتي قاتلان دي. تورنو کسانو ویلي، د ډاکټر اولیا جان وزیر تربرونو ورته د هغه د وژلو پر سر پیسې منلې وې.

ډاکټر اولیا جان وزیر د کوهاټ ځنګلخېلو په «ګلوبېره چوک» سیمه کې پر موټرسایکل سپرو په ډزو وواژه.

وزل شوی ډاکټر د شمالي وزیرستان د شوې تحصیل اوسېدونکی وو.

بلخ کې د نوي امنیه قومندان ګومارنې د ځینو مخالفت راټوکولی

د افغانستان له بلخ ولایته د تاو تریخوالي راپورونه رارسیدلي دي. د مارچ پر ۱۴مه دغه شخړه له هغه وروسته پیل شوه چې د افغان ولسمشر لخوا نوی ټاکل شوی امنیه قومندان عبدالرقیب مبارز د کمانډویانو په ملتیا مزار شریف ښار ته ورسېد، خو پخواني امنیه قوماندان جنرال محمد اکرام سامع یې مخالفت وکړ.

د بلخ ولایت چارواکي او د امنیه قوماندانۍ چارواکي تر دې ګړۍ رسنیو ته څه نه وايي، خو په مزار شریف کې د مشال راډیو خبریال وايي، غیر مسوله وسله وال کسان چې په شخصي لباسونو کې دی، د بلخ د امنیه قومندانۍ شاوخوا لیدل کېږي.

د بلخ د والي ویاند منیر فرهاد وايي، دا چې عبدالرقیب مبارز د نوي امنیه قومندان په توګه معرفي کړل شي او که نه؟

په دې اړه همدا اوس د ولایت د ودانۍ دننه بحث روان دی.

تر اوسه د تاو تریخوالي له وجې د مرګ ژوبلې کوم راپور نه دی ورکړل شوی.

د بلخ پخواني والي عطا محمد نور د اکرم سامع د لرې کولو او د نوي امنیه قومندان په توګه د عبدالرقیب مبارز د ټاکل کیدو مخالفت کړی وو.

امريکا د بوينګ ۷۳۷ الوتکو پروازونه درولي

د امریکا د بوینګ ۷۳۷ میکس اته الوتکو، پروازونه درولي.

دا پرېکړه تر هغې وروسته وشوه چې د مارچ پر ۱۰مه د اېتوپیا هوایي چلند یوه بویینګ ۷۳۷ میکس اته الوتکه نسکوره شوه او ټولې سورلۍ یې ووژل شوې.

ولسمشر ډانالډ ټرمپ د مارچ پر ۱۳ مه نېټه په سپینه ماڼۍ کې خبریالانو ته وویل، د خلکو د خوندیتوب لپاره د اروپایي هېوادو په څیر د دې الوتکو پر الوتنو بندیز ولګول شو.

کینېډا هم پرون د دغو الوتکو الوتنې بندې کړې.

نېږدې پېنځه میاشتې مخکې د انډونيشيا د هوايي شرکت یوه الوتکه هم غورځیدلې وه.

"امريکا غواړي د ايران خامه تيلو واردات کم کړي"

رويټرز اژانس وايي، امريکا غواړي د روان کال مې مياشتې څخه د ايران د خامه تيلو برامدات ۲۰ فيصده راکم کړي.

اژانس زياتوي چې امريکا له واردونکيو هېوادونو غوښتې چې يا دې د تيلو واردات کم کړي یا دې بنديزونو ته تيار شي.

اژانس په خپل رپورټ کې د هغو دوو سرچينوحواله ورکړې چې له دې چارو خبر دي.

رويټرز په دې کې د يوې سرچينې له قوله ويلي،اوس مهال يې هدف دا دی چېد ايران د تيلو ورځنی برامدات تر يو ملين بېرله راکم کړل شي.

سرچينو ويلي، د ولسمشر ټرمپ انتظاميه اندېښنه لري چې که يې د ايران د تيلود خرڅولو پر خبره بشپړ او سمدستي توګه بندولو ټينګار وکړ نو ښايی دا اقدام په نړيوال بازار کې د تيلو بيې بېخې اوچتې کړي.

د امريکا بهرنيو چارو وزير مايک پومپيو د مارچ پر ۱۲ نېټه ويلي وو، هېواد يې غواړي چې د تيلو د نړيوال بازار حالت ته په پام سره د ايران د خامه تيلو برامدات صفر ته راورسوي.

د افغانستان وګړیو شمېر ۳۱.۶ میلیونه ته ورسېد

آرشیف/ د کابل ښار

د افغانستان سرشمېرنې ملي ادارې په لومړي ځل د دغه هېواد د وګړیو رسمي شمېرې په ډاګه کړې.

د دغې ادارې مرستیال حسیب‌ الله موحد په چارشنبه یوې خبري غونډې ته وویل د د نفوسو ټول شمېر ۳۱.۶ میلیونه دی چې۱۵.۴ میلیونه ‌یې ښځینه او ۱۶.۱ میلیونه‌ یې نارینه دي. نوموړی وايي چې د شهریت کارډونو او شناختي کاډونو وېشلو چارې به هم دوی پر مخ وړي.

د افغانستان اقتصاد وزارت مرستیال محمد اسماعیل رحیمي چې د سرشمېرنې په ډاګه کولو دغه غونډه کې یې ګډون کړی و، خوښي وښوده چې د وګړیو کره شمېرو په جوتېدو سره به د کاري زمینو د رامنځته کېدو تر څنګ د نړیوالو مرستو کچه هم څرګنده شي.

د ایران د تېلو برامدات صفر ته رسوو: پامپيو

د امریکا د بهرنیو چارو وزیر مایک پامپيو

د امریکا د بهرنیو چارو وزیر مایک پامپيو ویلي چې غواړي د ایران د خامو تېلو برامدات تر هغه حده چې نړیوال مارکېټ اجازه ورکوي، ژر صفر ته ورسوي.

هغه د مارچ پر۱۲مه د تکزاس ایالت په هوسټن ښار کې د تېلو د تجارانو غونډې ته وویل چې د ولسمشر ډونالد ټرمپ له حکومت سره همکاري وکړي او د امریکا د بهرني سیاست د ګټې لپاره په نړیوالو چارو کې ښکېل بد لوبغاړي محدود کړي.

نړیوالو قدرتونو په ۲۰۱۵ز کال کې له ایران سره هوکړه وکړه چې د یو لړ اقتصادي بندیزونو د لیرې کېدو په بدل کې خپل اټومي فعالیت محدود کړي.

خو کله چې په ۲۰۱۶ز کال کې ولسمشر ډونالد ټرمپ واک ته ورسېد، له دې موافقې ووت.

د امریکا له موافقې تر وتلو وروسته هغه بندیزونه چې لیرې شوي وو، له سره پر ایران ولګول.

د خامو تېلو صادرات د ایران د اقتصاد ستره تمویلوونکې سرچینه ده.

د بريتانيا پارلېمان له اروپايي اتحاديې د وتلو وړانديز رد کړ

د بریتانیا پارلېمان.

د بریتانیا د پارلېمان غړیو له اروپايي ټولنې د وتلو په اړه د وزیر وزيراعظمې تېريزا مې پلان په دوهم ځل په اکثریت سره رد کړی دی.

د مارچ پر۱۲مه د بریتانیې د استازو د جرګې یا هاوس اف کامنز غړیو د ۲۴۲ رایو په مقابله کې دغه لوظنامه په ۳۹۱ رایو رد کړه.

وزیر اعظمې له دې یوه ورځ وړاندې ویلي وو چې دغه پلان ته يې بیا کتنه کړې او د ارویايي ټولنې يې قانوني ډاډ ترلاسه کړې.

په پارلېمان کې دا رای په داسې وخت کې ورکول کېږي چې که لوظنامه کېږي او که نه خو بریتانیا به په ۱۷ورځو کې دننه په رسمي توګه له اروپايي ټولنې وځي.

د اروپايي ټولنې د وتلو په اړه پارلېمان د وزير اعظمې تېريزا مې وړاندینې تجاویز د جنورۍ په میاشت کې رد کړي وو.

دا نوې لوظنامه د ټولنې د وتلو د شرایطو په اړه وه چې په کې په راتلونکي وخت کې د بریتانیې او اروپايي ټولنې د اړیکو په اړه څه نه وویل شوي.

افغان حکومت د برمل پېښه څېړي

د هلمند نقشه

د افغانستان سرحدونو او قبایلو چارو وزارت د مارچ پر ۱۲مه په يوه خبرپاڼه کې وويل چې د هغو اوازو په اړه څېړنه کوي چې د پکتیکا ولایت په برمل ولسوالۍ کې د یوه برید په اړه راپورته شوې او ويل شوي چې د ګډو ځواکونو په عملياتو کې وزيرستاني کډوال په نښه شوې دي.

په خبرپاڼه کې راغلې چې د سرحدونو او قبایلو چارو وزارت د دغو اوازونو په جدي تعقیب بوخت دی او له ټولو افغانانو غواړي، چې په دې اړه د دښمن د ناسمو او مغرضانه تبلیغاتو تر اغېز لاندې رانه شي.

بلخوا د افغانستان د پکتيکا ولايت امنيې قوماندان جنرال غلام سخي روغ ليوني د مارچ پر ۱۱مه له مشال راډيو سره په خبرو کې پر ټولنيزو مطبوعاتو ورکړل شوي هغه معلومات ناسم وبلل چې وايي، وژل شوي د وزيرستان کډوال وو.

هغه ۱۵ طالبان وژل شوي چې درې يې عربان دي او کوم ولسي وګړی پکې نشته.

طالبانو تر اوسه په دې اړه څه نه دې ويلي.

بلخوا د پاکستان سرکاري راډیو د يو خبر ترمخه د پاکستان د بهرنیو چارو وزارت ويلي چې د افغان امنیتي ځواکونو لخوا په پکتیکا کې د پاکستان اتو قبایلو د وژنې په سختو ټکو کې غندنه کوي.

په هلمند کې چاودنې یو سیمه‌ییز خبریال ټپي کړی

لیکوال او خبریال نثار احمد احمدي

د افغانستان هلمند ولايت د والي له دفتره په د مارچ پر۱۲مه خبرپاڼه کې ويل شوي چې يو ځايي خبريال نثار احمد احمدي د مقناطیسي بم په چاودنه کې ټپي شوی دی.

د خبرپاڼې ترمخه د هلمند والي محمد ياسين دا بريد غندلی او د پلټنو حکم یې کړی دی.

احمدي چې روغتیايي حالت‌ يې ښه بلل شوی دی، سهار د کار په لور روان و چې موټر ته يې ايښودل شوي مقناطیسي بم چاودنه وکړه.

په افغانستان کې د خبريالانو بېلابېلو ټولنو له حکومته د خبريالانو د خوندېتوب غوښتنه کړې او په دې حمله کې د شفافو پلټنو وروسته بريد ګرو ته د سزا غوښتونکي دي.

تر اوسه چا د دې بريد ذمه واري نه ده منلې.

امریکا له وینیزویلا خپل ټول سفارتکاران ورایستلي دي

په وینزوویلا کې د امریکا سفارت

امریکا له وینیزویلا خپل سفارتکاران تر هغه څو ساعته وروسته ورایتسلي چې واشنګټن د روس پر يوه بانک له دې کبله بندیزونه ولګول چې د وينیزويلا د تېلو له يوې سرکاري کمپنۍ سره يې کاروباري راکړه ورکړه کړې ده.

روس دا مهال په ستونزو کې ګېر د وينیزويلا ولسمشر نيکولس مدورو تر ټولو لوی ملاتړی دی.

بلخوا د امريکا ولسمشر ډونلډ ټرمپ مدورو يو غېر قانوني مشر ګڼي او د اپوزیشن مشر يووان ګوايدو ملاتړ کوي.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG