د جولای پر ۲۷مه د چین په چینګدو ښار کې د امریکا قونسلګري تر هغې درې ورځې وروسته تړل شوې چې امریکا په هیوسټن کې د چین قونسلګري بنده کړه.
د چین سرکاري ټېلېوېژن وښودل چې د جولای ۲۷مې پر سهار د امریکايي قونسلګرۍ له ودانۍ څخه د هغه هېواد بیرغ (جنډه) ښکته شو او کارکوونکي یې تر ورکړي مهلت مخکې د وتلو لپاره ورغونډ شول.
هلته د امریکا د ټېکسس ایالت په هیوسټن کې چینايي سفارتکاران د واشنګټن په امر د جولای پر ۲۴مه له خپلې قونسلګرۍ وتلي دي.
د امریکا د بهرنیو چارو وزیر مایک پومپېو پر بیجنګ تور پورې کړی چې په هیوسټن کې خپله قونسلګري د جاسوسۍ او معلوماتو غلا کولو لپاره استعمالوي.
بلخوا د چین د بهرنیو چارو وزارت په وینا، په چینګدو کې یې د امریکا قونسلګرۍ تړل یې د واشنګټن "نامناسبو کړنو ته یو قانوني او ضروري ځواب" دی.
د امریکا بهرنیو چارو وزیر مایک پامپېو د جولای پر ۲۳مه، د امریکا پر ملګرو هېوادونو غږ وکړ چې د چین کمونیسټ ګوند د هغو هیلو او ارمانونو پر وړاندې "یو موټی" شي چې ځان په نړۍ کې "تر ټولو لوړ" بولي.
د دواړو هېوادونو ترمنځ اړیکي د سوداګرۍ، فکري شتمنیو حقونو، پېنځه جي ټېکنالوژۍ او بشري حقونو په ګډون د یو شمېر موضوعاتو له وجې وار له مخه ترینګلي ول چې روان کال د کورونا وایرس وبا له وجې یې تعلقات نور خراب شول.
په چېنګدو کې د امریکا د قونسلګري پر ووبپاڼه لیکل شوي چې دا قونسلګري پر ۱۹۸۵ز کال پرانیستل شوې او شاوخوا ۲۰۰ کسان پکې کار کوي چې ورڅخه یې ۱۵۰ سیمه ییز کارکوونکي دي.
د فېسبوک تبصرې