د لاسرسي ځای

تازه خبر

کورونا وایرس وبا: اروپايي هېوادونه بندیزونه نرموي


اېټالیا کې چارواکو خلکو ته خبرداری ورکړی چې له یو بل سره له نېږدې تماسه ډډه وکړي.

د اروپا په ځینو هېوادونو کې، چې کورونا وایرس ډېر ځپلي، حکومتونه هڅه کوي چې بندیزونه تر یوه حده نرم کړي.

په هسپانیا کې ماشومان د اپرېل پر ۲۶مه تر شپږ اوونیو وروسته د لومړي ځل لپاره له کورونو څخه ووځي.

د هسپانیا وزیراعظم د څو نورو اروپايي هېوادونو په شان پرېکړه کړې چې د کورونا وایرس د خپرېدا د مخنیوي لپاره محدودیتونه نرم کړي.

پیدرو سانچېز اعلان کړی چې ماشومانو ته اجازه ورکوي چې د لویانو تر څار لاندې د یو ساعت لپاره ووځي خو د خپلو کورونو له شاوخوا څخه باید یو کېلومیټر لیرې لاړ نه شي.

د پلازمېنې مدرید اوسېدونکيو، چې بندیز ستومانه کړي دي، د حکومت د پرېکړې تر اعلان وروسته، د اپرېل ۲۵مې پر ماښام د خپلو کورونو په اپارتمانونو کې لوښي وکړنګول.

هلته روغتیايي چارواکو خبرداری ورکړی چې د محدودیتونو ژر پای ته رسېدا کېدای شي چې پر پراخ کچ د وایرس خپرېدو ته زمینه برابره کړي او د محدودیتونو له وجې لاسته راوړنې ضایع شي.

خو سانچیز وویل چې ۱۴ کلن او تر دې کشر ماشومان به د بندیزونو په نرمېدو خوشاله شي.

د اپریل میاشتې په پیل کې په هسپانیا کې د کورونا وایرس له کبله د مړینو شمېر خورا لوړ شوی وو.

بیلجیم او اېټالیا هم بندیزونه نرموي

بیلجیم هم د بندیزونو د تدریجي کمولو پلان وړاندې کړی دی.

د هغه هېواد حکومت وايي چې د مې له څلورمې څخه په روغتونونو کې د غیر ضروري درملنو برخې پرانېزي او دغه راز د ټوکر جوړولو او ماسک جوړولو پلورنځیو ته د کار د پیلولو اجازه ورکوي.

اېټالیا به هم د مې له څلورمې نېټې بندیزونه نرم کړي.

خو د هغه هېواد چارواکو خلکو ته خبرداری ورکړی چې د بندیزونو له نرمېدو سره سره له یو بل سره له نېږدې تماسه ډډه وکړي.

حکومت وايي، په ځانګړو استوګنځایونو کې اوسېدونکو زړو خلکو، پولیسو، حکومتي چارواکو او د ټرانسپورټي وسایلو کارکوونکو ته وړیا ماسکونه ورکوي.

په اېټالیا کې د اروپا د بل هر هېواد پرتله پکې ډېر کسان د کورونا وایرس ناروغۍ وژليږ

هغه هېواد د اپرېل پر ۲۵مه د ۴۱۵ کسانو د مرګ خبر ورکړ چې ورسره هلته د مړو شمېر تر ۲۶ زره لوړ شوی دی.

په فرانسه کې حکومت پرېکړه کړې چې د مې له ۱۱ څخه بندیزونه نرم کړي.

په برتانیا کې. چې پکې کورونا وایرس د مړینو شمېر تر ۲۰ زرو اوښتی، حکومت لا د بندیزونو د نرمولو اراده نه لری.

د اروپا ځینو هېوادونو د محدودیتونو نرمولو اعلانونه پر داسې مهال کړي چې په نړۍ کې د کورونا وایرس ناروغۍ (کووېډ - ۱۹) څخه د وژل شویو شمېر تر دوه لاکه اوښتی دی.

په دوی کې تر ټولو زیات کسان په امریکا کې مړه شوي دي.

د جانز هاپکېنز پوهنتون له وینا سره سم، په امریکا کې شاوخوا نهه نیم لاکه خلک کورونا وایرس وهلي چې پکې تر ۵۳،۰۰۰ زیات وژل شوي دي.

د فېسبوک تبصرې

ځانګړې پاڼې

له موږ سره اړیکي

XS
SM
MD
LG