د ډېره اسماعيل خان پوليس وايي چې د مارچ پر ۲۱مه په پوټه سيمه کې پر پوځي قافله ځانمرګي بريد کې دوه سرتېري وژل شوي او ۲۲ ژوبل دي.
د ضلعې د پوليسو يوه چارواکی چې له رسنيو سره يې د خبرو کولو اجازه نه لرله، د نوم نه ښوولو په شرط مشال رېډيو ته وويل چې نن (د مارچ پر۲۱) د ډېره اسماعيل په پوټه سيمه کې پوځي قافله روانه وه چې د ټانک او ډېره اسماعيل خان ترمينځ په پوټه سيمه کې ورباندې ځانمرګۍ بريد وشو.
نوموړي په اړه نور معلومات شریک نه کړل. په ډېره اسماعيل خان کې د ژغورنې ادارې ريسکيو ۱۱۲۲ لخوا مشال رېډيو ته په استول شوي بیان کې بيا ويل شوي چې په بريد کې ګڼ کسان ژوبل دي چې د ضلعې پوځي روغتون ته وړل شوي دي. د حملې ذمه وارې تر اوسه پورې هېچا نه ده منلې.
د روان کال ۲۰۲۴ د فبرورۍ پر پینځمه هم شپې شاوخوا درې بجې د ډېره اسماعيل په درابڼ کې پر چوډه تاڼه وسله والو (چودوان) بريد وکړ چې پکې ۱۰ پوليس سرتېري وژل شوي او شپږ ټپیان شوي وو.
دا هم وګورئ:
خواجه اصف وايي اسلام اباد کولای شي د پاکستان له لارې هند ته د افغانستان د تجارت مخه ډب کړي د کورمې مشران وايي هلته د پاکستان او افغانستان ترمينځ ډزې درېدلې ديتر دې وړاندې هم په درابڼ کې پر امنیتي ځواکونو يو شمېر حملې شوې دي چې یوه هغه يې د ۲۰۲۳ز کال د ډېسېمبر پر ۱۲مه شوې وه چې پکې ۲۳ پوځيان وژل شوي او تر ۳۰ زیات ټپیان ول.
د هغې حملې ذمه واري د تحریک جهاد پاکستان په نوم یوې کمې پېژندل شوې ډلې منلې وه خو د تازه بريد مسوولیت چا لا نه دی منلی.خو دا په داسې حال کې ده چې په خيبرپښتونخوا او بلوچستان کې د وسله والو بريدونه زيات شوي دي.
د پاکستاني پوځ د عامه اړيکو ادارې (ای اېس پي ار) د مارچ پر ۲۰ ناوخته په بیان کې ويلي چې اته وسلوالو د بلوجستان د ګوادر بندري چارو ودانۍ ته د ننوتلو هڅه وکړه چې امنیتي ځواکونو ووژل. بې اېل اې پر هغه ودانۍ د حملې ذمه واري منلې ده.
تر دې مخکې د پاکستاني پوځ د عامه اړيکو ادارې (ای اېس پي ار) ويلي وو چې د مارچ په ۱۶ مه وسله والو د شمالي وزیرستان د ميرلي پر پوځي مرکز په ځانمرګي بريد او تر هغه وروسته په ډزو کې د پوځ د دوو افسرانو په ګډون اووه سرتېري ووژل.
د پاکستان پوځ دا نه وو ويلي چې هغه بريد چا کړی وو خو د پاکستانیو طالبانو حافظ ګل بهادر ډلې د برید ذمه واري منلې وه.
بلخوا د پاکستان پوځي او حکومتي چارواکي وايي چې د خيبرپښتونخوا او بلوچستان په يوشمېر سيمو کې يې د وسله والو پرضد عملياتو کې يوشمېر وسله وال وژلي دي.
اسلام اباد تر دې مخکې هم په افغانستان کې د طالبانو پر حکومت تور پورې کړی وو چې د تحریک طالبان پاکستان (ټي تي پي) په ګډون یې نورو وسلوالو ته پټنځایونه ورکړي دي او ورڅخه یې د ټي ټي پي د وسلوالو ورسپارلو غوښتنه کړې ده.
خو د طالبانو حکومت وایي چې د پاکستان په شمول هېڅ ګاونډي هېواد ته د ضرر پېښولو او ستونزو جوړولو اراده نه لري.