د اسلام اباد یو عدالت د مارچ پر ۱۸مه د تحریک انصاف ګوند مشر عمران خان ته، په توشه خانه قضیه کې، له عدالته دباندې له حاضرۍ ورکولو وروسته، واپس کور ته د تلو اجازه ورکړه.
پخوانی وزیراعظم او د تحریک انصاف ګوند مشر په همدغه ورځ سهار په لاهور کې د خپل استوګنځي زمان پارک نه د یوې قافلې په بڼه پلازمینې اسلام اباد ته په داسې حال کې روان شوی وو چې په لاره د پولیسو او د تحریک انصاف د پلویانو ترمنځ د اخ و ډب راپورونه هم ورکړل شوي وو. اسلام اباد ته په رسېدو هم دا لړۍ روانه وه.
د عمران خان د توشه خانې قضیې اورېدنه د اسلام اباد په جوډيشل ودانۍ کې وه. عمران خان محکمې ته داخل نه شو او د عدالت د ودانۍ نه دباندې یې خپله حاضري ضلعي جج ظفر اقبال ته ورکړه. قاضي د عمران خان حاضري ومنله، د هغه لاس لیک یې واخیست او بیا یې نوموړي ته د ستنېدو اجازه ورکړه. د عمران خان سره د هغه سلګونه پلویان هم د قافلې په شکل کې د عدالت د ودانۍ مخې ته موجود وو. عدالت عمران خان د توشه خانې په قضیه کې په رسمي ډول د تورنولو لپاره ورغوښتی وو.
قاضي له جوډيشل کمپلېکسه دباندې د اسلام اباد د پوليسو او د پي ټي ايي د کارکنانو ترمينځ نښتو ته په اشارې سره وويل چې په داسې شرایطو کې د مقدمې اورېدنه شونې نه ده. نوموړي هلته راټولو شویو خلکو ته امر وکړ چې د عمران خان لخوا د حاضرۍ لګولو نه وروسته دې هغوی هم خواره واره شي.
ډسټرکټ او سیشن جج ظفر اقبال وویل، د تحریک انصاف د مشر عمران خان د حاضرۍ د لاسلیک تر لاسه کېدو وروسته به د اورېدنې نوې نېټه وټاکل شي. وروسته قاضي د یادې قضیې اورېدنه د مارچ تر ۳۰مې نېټې وځنډوله.
د رسنیو د راپورونو له مخې د پخواني وزيراعظم سره ورغلو پلویانو هڅه کوله چې د عدالت احاطې ته ننووځي خو د امنيتي انتظاماتو له وجې هغوی ته د ورتلو اجازه ورنکړل شوه۔
تر دې وړاندې تحريک انصاف ګوند په خپله رسمي ټويټر پاڼه د اسلام اباد پر پوليسو تور پورې کړی وو چې د عمران خان په ګاډي او قافلې يې شيلنګ کړی چې مقصد يې د نوموړي عدالت ته حاضرېدو مخه نيول دي.
اسلام آباد پولیس، چئیرمین تحریک انصاف عمران خان کی گاڑی اور قافلے پر بلااشتعال شیلنگ کر رہی ہے. مقصد فساد ڈالنا ہے اور عمران خان کو عدالت پیشی سے روکنا ہے#PakistanUnderFascism pic.twitter.com/Vox3Q6W6Uw
— PTI (@PTIofficial) March 18, 2023
بلخوا د پاکستان وزيراعظم شهباز شريف په خپله ټويټر پاڼه ليکلي چې عمران خان له تېرو څو ورځو راهيسي "جنګيالۍ" لارې خپلې کړي چې ولس د ډال په توګه کاروي او پر پوليسو بريدونه کوي.
If anyone had any doubt, Imran Niazi%27s antics of the last few days have laid bare his fascist & militant tendencies. From using people as human shields to throwing petrol bombs at police to leading %27jathas%27 to intimidate judiciary, he has taken a leaf out of the RSS book.
— Shehbaz Sharif (@CMShehbaz) March 18, 2023
پرون (د مارچ پر ۱۷مه) د عمران خان وکيلانو په عدالت کې د هغه د ګرفتارۍ د امر پر ضد درخواست جمع کړی وو چې عدالت منظور کړ او هغه ته یې د مارچ پر ۱۸مه عدالت ته د حاضرېدو موقع ورکړه.
د پاکستان تحریک انصاف ګوند مشر عمران خان په بيا بيا دعوه کړې ده چې عدالت ته د نه حاضرېدو لامل یې ژوند ته ګواښ دی.
اب یہ واضح ہو چکاکہ تمام مقدمات میں عدالت سے ضمانت حاصل کرنےکےباوجود پی ڈی ایم حکومت مجھے گرفتار کرنا چاہتی ہے۔ ان کی تمام تر بدنیتی کے باجود میں عدالت میں پیشی کےلئےاسلام آباد جارہا ہوں کیونکہ قانون کی حکمرانی پر یقین رکھتا ہوں۔مگرمجرموں کے اس گروہ کی بدنیتی اور اصل عزائم کے
— Imran Khan (@ImranKhanPTI) March 18, 2023
عمران خان د مارچ پر ۱۸مه پر خپل ټوېټر لیکلي وو، هغه په ټولو مقدمو کې له عدالته ضمانتونه ترلاسه کړي خو د پي ډي اېم حکومت د هغه ګرفتارول غواړي. نوموړي لیکلي، د "هغوی" د ټولو "بدنیتیو" باوجود عدالت ته روان دی.
بل پلو د پاکستان د اطلاعاتو او نشریاتو مرکزي وزیرې مریم اورنګزیب پر پخواني وزیراعظم عمران خان سختې نیوکې کړې دي چې عدالتونه یې په وار وار غواړي خو هغه نه حاضرېږي. نوموړې د مارچ پر ۱۸مه په اسلام اباد کې یوې خبري غونډې ته د وینا پر مهال وویل، پر عمران خان په توشه خانه مقدمه کې د ۲۰۲۲ کال د اګست ۱۸مې نېټې نه فرد جرم لګول شوی خو هغه د ۲۰۲۳ز کال د مارچ په ۱۸مه عدالت ته حاضري ورکوي.
نوموړې پر ټویټر هم لیکلي چې د عمران خان د پلویانو لخوا د پولیسو سره نخښتې د عدالت له حکمه سرغړونه ده.
پولیس کے سر پھاڑنے ،عدالتی نظام ، ریاست پر حملہ آور دہشت گرد کو ضمانت کا بنڈل پیکج ملا۔ ریاست کے لئے زخم کھانے والوں کو پیغام ہے کہ فارن ایجنٹ گھڑی چور آئین، قانون اور نظام عدل سے بالا تر ہے۔ #دہشتگرد_عمران نے پٹرول بم پولیس اور رینجرز پہ نہیں عدالتی احکامات پہ پھیلیں ہیں
— Marriyum Aurangzeb (@Marriyum_A) March 18, 2023
د مارچ پر ۱۸مه په لاهور کې زمان پارک سیمه کې پولیس د عمران خان کور ته ننوتلي وو. راپورونه وايي، پولیسو د تحریک انصاف ګوند پلویانو د نیولو لړۍ هم پیل کړې ده. په کور دننه د عمران خان د پلویانو او پولیسو ترمنځ د اخ و ډب راپورونه هم ورکړل شوي دي.
د مارچ پر ۱۸مه د لاهور پولیسو په لاسپیکرونو اعلانونه کول چې په یاده سیمه کې د ۱۴۴مې دفعې له مخې د ګڼو کسانو په راټولېدو بندیز لګول شوی دی.
دا هم وګورئ: عدالت د عمران خان د گرفتارۍ ناقابل ضمانت امر د مارچ تر ۱۸مې نېټې ځنډولید مارچ پر ۱۴مه د پاکستان په یوشمېر ښارونو کې تر هغې وروسته مظاهرې پیل شوې چې پولیس او د رېنجرز ځواک سرتېري د عمران خان ګرفتارۍ لپاره په لاهور کې د هغه د کور مخې ته ورغونډ شول. هغه مهال د پولیسو او تحریک انصاف پلویانو ترمینځ د اخ و ډب په پېښو کې شاوخوا ۶۰ کسان ژوبل شول.
بلخوا لاهور های کورټ پرون (د مارچ پر ۱۷مه) په نهو مقدمو کې د عمران خان حفاظتي ضمانت منطور کړ. په دې مقدمو کې په عمران خان د ترهه ګرۍ په ګډون يوشمېر تورونه دي. عمران خان په وار وار دغه تورونه رد کړي دي.