د پاکستان نوي پوځي مشر جنرال سيد عاصم منیر نن (د نومبر پر ۲۹مه) په راولپېنډۍ کې د پوځ په مرکزي دفتر (جي اېچ کيو) کې په یوه دستوره کې له جنرال قمر جاوېد باجوه څخه يې د پوځ قومانده تر لاسه کړه.
د جنرال باجوه کاري موده د نومبر پر ۲۹مه پای ته ورسېده او سر له ننه جنرال عاصم منیر د پاکستان د نوي پوځي مشر په حیث خپله دنده پیل کړه. جنرال منير د هغه هېواد د پوځ ۱۷م مشر دی.
د قوماندې د بدلون په دغه دستوره کې پوځی مشرانو ګډون وکړ چې سرکاري او شخصي ټېلېويژن چینلونو نېغ په نېغه پوښښ ورکاوه.
General Qamar Javed Bajwa officially handed over the command of Pakistan Army to General Asim Munir.General Asim is the new Chief of the Army Staff Pakistan.The biggest challenge for him to keep the military Apolitical as vowed by the forces lately.TTP is another challenge. pic.twitter.com/eyOwFcmge6
— Shama Junejo (@ShamaJunejo) November 29, 2022
د پاکستان حکومت د نومبر پر ۲۴مه د پوځ د نوي مشر په حیث د جنرال عاصم منیر د ټاکلو اعلان وکړ.
جنرال منير په داسې وخت کې د پاګستاني پوځ قومانده په لاس کې واخيسته چې ناقانونه وسلوالې ډلې تحریک طالبان پاکستان د نومبر پر ۲۸مه خپلو جنګیالیو ته په پاکستان کې د بريدونو کولو امر کړی دی.
دا لا څرګنده نه ده چې نوموړی به د پاکستاني طالبانو پر وړاندې څه ډول تګلاره خپلوي.
عاصم منير څوک دی؟
د پاکستانی رسنيو تر مخې جنرال عاصم منیر د پوځ روزنيزې اداری منګلا څخه د افسرۍ په امتحان کې بریالۍ شوی دی او د خپل کاري مودې پر مهال یې د پوځ د اوسني مشر جنرال قمر باجوه لاندې يې د هېواد په شمالي سيمو کې د برېګېډيير په توګه کار کړی دی.
هغه په ۲۰۱۲ز کال کې د پوځ استخباراتي ادارې (اېم ای) مشر شو او وروسته په ۲۰۱۸ز کال کې د استخباراتي ادارې (ای اېس ای) مشر جوړ شو چې بیا ۸ میاشتې وروسته له دې څوکۍ څخه لیرې کړل شو او پر ځای يې جنرال فیض حمېد وټاکل شو.
د ای اېس ای له څوکۍ څخه تر لیرې کېدو وروسته هغه د ګوجرانوالا کور کمانډر جوړ شو چې بیا دوه کاله وروسته په راولپنډۍ کې د پوځ په مرکزي دفتر (جي اېچ کيو) کې د کوارټر ماسټر پر څوکۍ وګمارل شو چې دا مهال پر هم دې عهده دی.
د پاکستان شخصي ټېلېوېژن وايي چې جنرال عاصم منیر به د پاکستان پوځ هغه لومړی مشر وي چې د دوو مهمو استخباراتي ادارو ای اېس ای او اېم ای مشر پاتې شوی دی.
د جنرال قمر جاوېد باجوه تقاعد
جنرال قمر جاوېد باجوه په ۲۰۱۶ز کال کې د پوځ مشر ټاکل شوی وو. نوموړی دوې دورې د پاکستان د پوځ مشر پاتې شو. نوموړي چې په ۲۰۱۹ز کال کې خپله درې کلنه کاري موده سرته رسوله نو د هغه وخت وزیراعظم عمران خان يې موده د درو نورو کلونو لپاره وغځوله او دا ډول شپږ کاله د پوځ د مشر پر چوکۍ پاتې شو.
جنرال باجوه پر داسې مهال ریټایرډ (تقاعد) شو چې د نومبر پر ۲۰مه د فیکټ فوکس په نوم د تحقیقاتي ژورنالېزم یوې ووبپاڼې د پاکستاني خبریال یو رپورټ خپور کړ چې پکې دعوه شوې چې په تېرو شپږو کلونو کې د باجوه او د هغه د کورنۍ شتمنۍ اربونو روپیو ته رسېدلې دي.
د دې په غبرګون کې د نومبر پر ۲۷مه د پاکستان پوځ ویلي وو چې د جنرال قمر جاوېد باجوه د شتمنیو په اړه یو وروستی پلټنیز رپورټ او پر ټولنیزو شبکو روان بحثونه "ګمراه کوونکي" دي چې ردوي یې.