هند د ۱۹ کالو څخه د کم عمر لوبغاړو د ۵۰ اووره کرکټ نړیوال جام په نیمه پایلوبه کې افغانستان ته په ماتې ورکولو پايلوبې يا فاينل ته ورسېد.
د فېبرروۍ پر څلورمه، د زېمبابوې په هرارې کې شوې دې سيمي فاينل يا نيمه پايلوبه کې افغان لوبډلې د لومړي بيټينګ په کولو سره په ټولو ۵۰ اوورونو کې د څلورو لوبغاړو په اوټ کېدو ۳۱۰ منډې جوړې کړي.
د افغانستان لخوا فیصل شينوزاده او عزيرالله نیازي سليزې ووهلې.
په ځواب کې یې هند لوبډلې په ۴۲م اوور کې د درو لوبغاړو په سوځېدو دا هدف پوره کړ.
د هند لخوا ارون جارج تر ټولو ډېرې، ۱۱۵ منډې وکړي.
د دې نړيوال جام پايلوبې ته د انګلينډ لوبډله واردمخه وتلې ده. هغوی په نیمه پای لوبه کې اسټرالیا ته ماتې ورکړې وه.
د زېمبابوې او نمېبیا په کوربه توب د نړیوال جام سیالۍ د جنورۍ پر ۱۵مه پیل شوې وې او ټاکل شوې چې پایلوبه یې د فبرورۍ پر شپږمه د هرارې په لوبغالي کې ترسره شي.
د ۲۰۲۴ز کال نړیوال جام اسټرالیایۍ لوبډلې ګټلې وو.
