په افغانستان کې د واکمنو طالبانو حکومت وايي، د پاکستان دا خبره سمه نه ده چې ګواکې افغانستان ترهګرو ته پټنځايونه ورکړي دي.
د افغان طالبانو د حکومت ویاند ذبیح الله مجاهد د جولايي پر ۱۵مه مشال راډيو ته په استولي غږيز پيغام کې ويلي چې " افغان طالبان د جنګونو له زیانونو خبر دي او نه غواړي چې بل چاته دغه زیانونه ورسوي."
د ذبیح الله مجاهد په وینا، د پاکستان د دفاع وزیر خواجه اصف له خوا په دې اړه ورکړل شوې بیان سم نه دی.
دا له هغه وروسته ده چې د پاکستان د دفاع وزیر خواجه اصف د جولايي پر ۱۵مه تور پورې کړ چې افغانستان د یو ګاونډي هېواد په توګه خپل کردار نه ترسره کوي او نه د دوحې پر تړون عمل کوي.
خواجه اصف پر خپله ټویټر پاڼه لیکلي چې پاکستان له ۵۰ تر ۶۰ لکو افغانانو ته له تېرو ۴۰ کالونو راهیسې پناه ورکړې ده.
د ده په وینا، "د دې برعکس په افغانستان کې هغو ترهګرو ته پناه ځایونه ورکړل شوي چې د پاکستانیو وګړو وینې تویوي او دا حالت نور جاري نشي پاته کېدای."
خواجه اصف له نور تفصیل ورکولو پرته لیکلي چې " پاکستان به د خپلو وګړو او خاورې د خوندیتوب لپاره له خپلو ټولو وسایل کار اخلي."
دا له هغه یوه ورځ وروسته ده چې د پاکستان پوځ د جولای پر ۱۴مه په افغانستان کې د "تحریک طالبان پاکستان (ټي ټي پي) د پټنځایونو پر موجودګۍ" او د هغې ډلې لپاره د "عملیاتو پر ازادۍ" د "سختې اندېښنې" څرګندونه وکړه.
د پوځ د عامه اړیکو دفتر (ای اېس پي ار) په بیان کې ویلي دي چې د پوځ مشر جنرال سید عاصم منیر د جولای پر ۱۴مه د کوټې چاوڼۍ ته سفر وکړ چې پر مهال یې ورته امنیتي چارواکو د بلوچستان په پښتون مېشته سیمو کې د ژوب د وروستي "ترهګر" برید په اړه معلومات ورکړل.
په بیان کې راغلي چې جنرال منیر د کوټې په سي اېم اېچ روغتون کې په هغه حمله او نښته کې د ژوبلو سرتېرو پوښتنه وکړه.
د جولای پر ۱۲مه شپې مهال په ژوب کې پر چاوڼۍ د وسلوالو په برید او وروسته په نښته کې نهه سرتېري وژل شوي ول.
د پاکستان پوځ هغه مهال ویلي ول چې په نښته کې یې پینځه مشکوک وسلوال وژلي دي. د پوځ په وینا، په چاوڼۍ کې تر یوشمېر ساعتونو نښته او بیا تصفیوي عملیات روان ول. د تحریک جهاد پاکستان په نوم یوې کمې پېژندل شوې وسلوالې ډلې د حملې ذمه واري منلې وه.
د جولای پر ۱۴مه د ای اېس پي ار په بیان کې راغلي دي چې د پاکستان پوځ د طالبانو له حکومته تمه لري چې د افغانستان خاوره به د "هېڅ هېواد پرضد د ترهګرۍ لپاره استعمالېدو ته پرې نه ږدي" او د ۲۰۲۰ز کال د دوحې موافقې ژمنې پوره کړي.
بیان وايي چې په پاکستان کې "په ترهګرۍ کې د افغان وګړو ککړتیا" بله "مهمه مسله ده چې باید حل شي." پوځ وايي، د ژوب چاوڼۍ په څېر حملې "د زغملو نه دي" او پر وړاندې به یې "موثر غبرګون" ښيي.
بیان زیاتوي چې د پاکستان په مختلفو برخو کې د وسلوالو پرضد عملیات د پخوا په څېر دوام لري.
په قطر کې د طالبانو د دفتر ویاند سهېل شاهین هم په دې اړه د پاکستان ډان ورځپاڼې ته ویلي چې دوی تل د دې وضاحت کړی چې د افغانستان خاوره د هېچا پرضد کارېدو ته نه پرېږدي.
طالبانو په دوحه کې د ۲۰۲۰ز کال د فبرورۍ په تړون کې ژمنه کړې وه چې د القاعدې په ګډون به هېڅ ډلې ته اجازه نه ورکوي چې د افغانستان خاوره د نورو هېوادونو پرضد وکاروي.
