پاکستان او په افغانستان کې د طالبانو حکومت د اختر په مناسبت پر يو بل د پينځو ورځو لپاره د بريدونو درولو اعلان کړی دی.
د پاکستان د اطلاعاتو وزير عطاالله تارړ د مارچ پر ۱۸مه پر اېکس په خپاره کړي بيان کې ويلي دي چې حکومت يې په خپل "ابتکار" او د سعودي عرب، قطر او د ترکیې په غوښتنه پرېکړه کړې ده چې په افغانستان کې د "غضب للحق عملیاتو" په نوم په روانو "عملياتو" کې "لنډمهاله وقفه" وکړي.
نوموړي زياته کړې ده چې دا وقفه به د مارچ د ۱۹مې شپې له ۱۲ بجو څخه د مارچ تر ۲۳مې تر نیمې شپې پورې نافذه وي.
تر دې بيان وروسته په افغانستان کې د طالبانو حکومت وياند ذبيح الله مجاهد هم پر اېکس پاڼه په بيان کې وويل چې ځواکونه يې د کوچني اختر په مناسبت او "د مینځګړو وروڼو اسلامي هېوادونو" سعودي عرب، ترکيې او قطر په غوښتنه په "رد الظلم دفاعي عملیاتو کې "لنډمهاله" وقفه اعلانوي.
د افغانستان او پاکستان نښتې د فبرورۍ پر ۲۱مه تر هغې وروسته پیل شوې چې د پاکستان پوځ په ننګرهار او پکتیکا کې پر یوشمېر سیمو هوايي او د درنو وسلو بریدونه وکړل، چې په ځواب کې يې طالبانو هم ډېورنډ کرښې په اوږدو کې پر پاکستانيو پوستو بريدونه وکړل. دواړو خواوو په هغو بريدونو کې يو بل ته د مرګژوبلې اړولو دعوې وکړې.
د مارچ پر ۱۶مه، د شپې شاوخوا نهه د افغانستان په پلازمېنه کابل کې د پاکستاني پوځ په برید کې سلګونه کسانو ته مرګژوبله واوښته.
په افغانستان کې د طالبانو حکومت د کورنيو چارو وزارت ویاند عبدالمتین قانع د مارچ پر ۱۷مه په کابل کې يوې خبري غونډې ته وويل چې د پاکستاني پوځ د جنګي الوتکو په بمبار کې په نشو د روږدو کسانو روغتون په نخښه شوی چې د هغه په وينا، پکې ۴۰۸ کسان وژل شوي او ۲۶۵ ژوبل شوي دي.
نوموړي زياته کړه چې د "امېد" په نوم په هغه روغتون کې د بېلابېلو ولايتونو او کابل شاوخوا ۳،۰۰۰ کسان تر درملنې لاندې ول.
خو د پاکستان د اطلاعاتو وزير عطاالله تارړ بيا د مارچ پر ۱۷مه پر اېکس پاڼه په بيان کې دعوه وکړه چې پوځ په کابل او ننګرهار ولایتونو کې "پوځي تاسيسات او د ترهګرۍ هغه مرکزونه په نخښه کړي چې په افغانستان کې د طالبانو د حکومت تر ملاتړ لاندې کار کوي."
وروسته د مارچ پر ۱۸مه د پاکستان پوځ وياند جنرال احمد شريف چودري هم له رسنيو سره په خبرو کې دعوه وکړه چې په هغه بريد کې يې "د وسلو ذخيرو کولو مرکز" په نخښه کړی دی.
مشال راډيو په خپلواکه توګه د ولسي مرګژوبلې کره شمېر او د پاکستان حکومت د ادعا نه شي تاییدولای.
د طالبانو د حکومت ویاند ذبیح الله مجاهد د مارچ پر ۱۷مه پر اېکس پاڼه په خپاره کړي بيان کې د پاکستان برید "د ټولو منل شویو اصولو خلاف بشرضد عمل" وباله.
نوموړي دعوه وکړې چې "د پاکستان پوځي رژیم روغتونونه او ملکي ځایونه په نخښه کوي او وحشت رامينځته کوي."
په کابل کې په نشو د روږدو کسانو پر مرکز بريد په پراخه کچه غندل شوی دی. د ملګرو ملتونو د بشري حقونو دفتر وویل چې هغه پېښه باید ژر، خپلواکه او په شفاف ډول وڅېړل شي، او زیاته یې کړه چې "مسوول کسان باید د نړیوالو معیارونو سره سم حساب ورکولو ته اړ شي."
د مارچ پر ۱۷مه ملګرو ملتونو په خپله اعلامیه کې وویل، "عیني شاهدانو د روغتون په ساحه کې د بشپړ ویجاړۍ صحنه بیان کړه او لیدل کېدل چې سلګونه کسان د خپلو خپلوانو د لټون لپاره ګرځېدل."
د ملګرو ملتونو د بشري حقونو دفتر داراز وايي چې د کابل روغتون له برید مخکې، د فبرورۍ له پای راهیسې د پاکستان او افغانستان ترمينځ په شخړو کې د ۱۰۴ ماشومانو او ۵۹ ښځو په ګډون لږ تر لږه ۲۸۹ افغان ولسي وګړي وژل شوي یا ژوبل دي او د جګړو له امله لسګونه زره کسان بې ځایه شوي دي.
داراز، د طالبانو په حملو کې هم د ډېورنډ کرښې هغې خواته پرتو ولسي وګړو ته مرګژوبله اوښتې ده او تر ۳،۰۰۰ زیات کسان بې کوره شوي دي.
د پاکستان حکومت په تېرو څلورو کلونو کې په بیا بیا پر طالبانو تور پورې کړی دی چې هلته یې د تحریک طالبان پاکستان (ټي ټي پي) په ګډون اسلام اباد مخالفه وسلوالو ته پټنځایونه ورکړي دي.
د طالبانو حکومت په وار وار ويلي چې د افغانستان خاوره د پاکستان په ګډون د هېڅ یوه ګاونډي هیواد پر ضد استعمالېدو ته نه پرېږدي.
خپله ټي ټي پي هم وايي چې وسلوال یې په پاکستان کې دي او په بل هېواد کې پټنځایونو ته اړتیا نه لري.
اخوا د پښتونخوا ملي عوامي ګوند، ملي جمهوري غورځنګ او پښتونخوا نيشنل عوامي ګوند مشرانو په يوه شريکه اعلاميه کې غوښتنه کړې چې پاکستان دې پر افغانستان بریدونه ودروي.
د مارچ پر ۱۶مه په خپره شوې اعلاميه کې راغلي دي چې دواړه خواوې دې ژر تر ژره مذاکرات وکړي او خپلمینځي اختلافات دې د خبرو له لارې حل کړي.
