په باکو کې د آزادي اروپا ازربايجانې څانګه په زوره تړل کيږي
په باکو کې د آزادي اروپا ازربايجانې څانګه په زوره تړل کيږي د آزادي اروپا آزادۍ راډيو ازربایجاني څانګه وايي چې د ازربايجان په سرښار باکو کې د څارنوالۍ د دفتر څو کسان ورننوتي دي چې د عدالتي فېصلې له مخې د دفتر تړلو خبره کوي. د ازربایجاني څانګې مشر کېنان علي یف وايي چې لږ تر لږه ۱۰ کسان د وسله لرونکو سرتېريو سره یو ځای نن سهار لس نیمې بجې د دوی دفتر ته ورننوتل. د دفتر شا و خوا ۲۰ کسانو ته د ځای تر هغه وروسته د ودانۍ پرېښودلو ويل شوي چې د څو ساعتونو لپاره په یوه کوټه کې ایسار کړل شوي ول. د دفتر ټیلی فوني او انټرنېټي رابطې یې هم پرې کړل شوي دي. رپورټونه وايي پلټونکو د دفتر د کاغذاتو او شخصي اسنادو غوښتنه کړې ده. څارنوالان وايي چې تر عدالتي حکم لاندې د یادې څانګې پلټنې ځکه کیږي چې د یوی بهرني ادارې په پیسو چلیږي. هم داسې طریقه د نړیوالو ادارو آيریکس او نېشنل ډیموکرېټیک انسټي ټيوټ د دفترونو د بندولو لپاره استعمال شوې وه. دا په داسې حال کې ده چې درې اوونۍ وړاندې یوه خبریاله خدیجه اسماعیلووا چې د آزادي اروپا آزادۍ راډيو له ازربایجاني څانګه سره هم کار کوي، په باکو کې پر دې تور جېل ته و لېږل شوه چې پر کار یې حکومت ته اعتراض و.