د پاکستان وزیراعظم شهباز شریف د ایران له ولسمشر مسعود پزشکیان سره په ټیلیفوني خبرو کې ویلي دي چې هېواد یې پر ایران د اسراییلو د پرله پسې بریدونو غندنه کوي او په دغو حملو کې د ملکي کسانو په وژنه اندېښمن دی.
شهباز شریف د مارچ پر ۲۸مه پر اېکس (پخواني ټویټر) په فارسي ژبه په پیغام کې لیکلي دي چې له مسعود پزشکیان سره یې د ټیلیفون له لارې تفصیلي خبرې وکړې چې تر یوه ساعته زیات دوام یې وکړ. شریف وايي، د ایران زړورو خلکو ته یې د پاکستان د ولس ملاتړ څرګند کړ او ورته یې ډاډګیرنه ورکړه چې هېواد به یې د منځني ختیځ د جګړې د حل لارې موندلو لپاره خپلو هڅو ته دوام ورکوي.
د پاکستان وزیراعظم وايي د ایران ولسمشر ته یې د هغو ډېپلوماټیکو هڅو په اړه هم معلومات ورکړل چې هېواد یې د منځني ختیځ د تاوتریخوالي د کمولو لپاره کوي. د پاکستان وزیراعظم پر اېکس خپور کړي بیان کې پر ایران د اسراییلو بریدونه غندلي خو د امریکا ذکر یې نه دی کړی.
امریکا او اسراییلو د فبرورۍ له ۲۸مې راهیسې پر ایران حملو ته دوام ورکړی دی او تهران یې په ځواب کې پر اسراییلو او په خلیجې هېوادونو کې د امریکا پر پوځي اډو د توغنديو او ډرون بريدونه جاري ساتلي دي.
