د لاسرسي ځای

تازه خبر

د کرکټ نړیوال جام: نن هند له بنګلادېش سره لوبه کوي


هند او بنګله دېش د سوپر اېټ په لومړي ګروپ کې دي.
هند او بنګله دېش د سوپر اېټ په لومړي ګروپ کې دي.

د کرکټ په ۲۰ اووریز نړیوال کپ کې د جون پر ۲۲مه هند له بنګلادېش سره لوبه کوي.

ټاکل شوې ده چې دا لوبه د پېښور پر وخت ماښام اوونیمې او د کابل پر وخت ماښام اووه بجې پیل شي.

هند او بنګله دېش د سوپر اېټ په لومړي ګروپ کې دي. هند د دې پړاو له درو لوبو څخه یوه کړې او ګټلې ده او بنګله دېش یوه لوبه کړې او هغه یې بایللې ده.

په دې پړاو کې دوې نورې لوبډلې د اسټرالیا او افغانستان دي. هغوی به د جون پر ۲۳مه سهار وختي لوبه کوي.

په هغوي کې هم اسټرالیا له درو لوبو لومړۍ هغه ګټلې خو افغانستان بایللې ده. د افغانستان لوبډله به نیمې پای لوبې ته د رسېدو لپاره له اسټرالیا او بنګله دېش سره پاتې دواړه لوبې ګټل وي.

جنوبي افریقا انګلستان ته په اوو منډو ماته ورکړه
جنوبي افریقا انګلستان ته په اوو منډو ماته ورکړه

بل پلو د جون پر ۲۱مه لومړی جنوبي افریقا د انګلستان لوبډلې او ویسټ انډیز د امریکا لوبډلې ته ماته ورکړه.

د وېسټ انډیز په ډیرېن سیمي لوبغالي کې د جون په ۲۱مه شوې سيالۍ کې جنوبي افریقا په ټاکلو ۲۰ اورونو کې د شپږو لوبغاړو په سوځېدو ۱۶۳ منډې جوړې کړې.

د دې په ځواب کې انګلېنډ په ټولو ۲۰ اورونو کې يوازی ۱۵۶ منډې وکړای شوې.

بل پلو ویسټ انډیز د امریکا لوبډلې ته په نهه وکټونو ماته ورکړه. امریکا لومړی بېټنګ وکړ او په ۲۰ اوور کې د ۱۲۸ منډو له جوړولو وروسته ټول اوټ شول.

په ځواب کې د ویسټ انډیز لوبډلې ورکړل شوی هدف په ۱۱م اوور کې یوازې د یوه لوبغاړي په سر پوره کړ.

ویسټ انډیز امریکا ته په نهو وکټونو ماته ورکړه
ویسټ انډیز امریکا ته په نهو وکټونو ماته ورکړه

د کرکټ په ۲۰ اووریز نړیوال کپ کې دا وخت د دویم پړاو یا سوپر اېټ کې د اتو لوبډلو ترمنځ لوبې روانې دي.

له دوی څخه به څلور نیمو پای لوبو ته وځي او دواړه نیمې پای لوبې به د جون پر ۲۷مه ترسره کېږي.

د نړیوال کپ پایلوبه به د جون پر ۲۹مه د ویسټ انډیز په باربیډوس کې تر سره کېږي.

د کرکټ ۲۰ اووريزه نړیوال جام تاریخچه

د کرکټ شل اووريز نړیوال جام د کرکټ نړیوالې شورا لخوا په دوه کالو کې یو ځل جوړېږي چې تراوسه پکې اته ټورنامنټونه شوي دي.

د جام لومړی ځل سیالۍ په ۲۰۰۷ز کال کې په جنوبي افریقا کې شوې وې او په پای لوبه کې هند پاکستان ته ماتې ورکړې وه.

په ۲۰۰۹ ز کال هم د پاکستان لوبډله پای لوبې ته وتلې وه او هلته یې سري لنکا ته ماته ورکړې وه.

له هغه وروسته د ۲۰۱۰ز کال جام انګلستان ګټلی وو، د ۲۰۱۲ز کال اتلولي ویسټ انډیز، د ۲۰۱۴ز کال سري لنکا، د ۲۰۱۶ ز کال ویسټ انډیز او د ۲۰۲۱ز کال اسټرالیا ګټلې وه.

په ۲۰۲۲ز کال کې انګلستان د پاکستان په وړاندې پایلوبه وګټله.

د مشال ځانګړې پاڼې

XS
SM
MD
LG