۲۰ اوریزه کرکټ نړیوال جام په لړ کې نن اسټرالیا بنګلادېش او وېسټ انډیز سري لنکا ته مخامخېږي.
د نومبر درېیمې په سیالیو کې هند افغانستان او نیو زیلینډ سکاټلینډ ته ماتې ورکړه.
د نومبر پر درېیمه د افغانستان کپتان محمد نبي د پچې تر ګټلو وروسته د توپ ویشتنې یا بالېنګ پرېکړه وکړه. هندیو بیټسمینانو روهېت شرما او کې اېل راهول د لوبې له پیله د افغانستان بالرانو لپاره مشکلات پیدا کړل.
هندۍ لوبډلې په ۲۰ اورونو کې د دوو لوبغاړو په سوځېدو، افغانستان ته د ۲۱۱ منډو هدف وټاکه. خو افغان لوبډلې د اووه لوبغاړو په سوځېدو ۱۴۴ منډې جوړې کړې او په ۶۶ منډو یې سیالي وبایلله.
د هند بریا نیمه پایلوبې ته د رسېدو لپاره د هغه هېواد د لوبډلې هیلې بیا ژوندۍ کړې. افغان لوبډله اوس هم نیمه پایلوبې ته د وتلو امکان لري. تر دې مخکې، د نیو زیلینډ او سکاټلینډ ترمینځ هم سخته لوبه وشوه خو نیو زیلینډ سیالي په ۱۶ منډو وګټله.
