د پاکستان د سیند او پنجاب صوبو په اسمبلیو کې د سېنېټ د انتخاباتو نارسمي نتیجې راغلې دي چې له مخې یې پیپلز ګوند ۱۱ او مسلم لیګ (ن) شپږ څوکۍ ترلاسه کړې دي.
د پایلو له مخې، د سیند له اسمبلۍ څخه د پیپلز ګوند ۱۰ او د متحده قامي موومېنټ پاکستان (اېم کیو اېم پي) یو او یو خپلواک نوماند منتخب شوي دي.
مسلم لیګ (ن) د پنجاب څلور څوکۍ ګټلې دي او له مرکز اسلام اباده دوه څوکۍ د مسلم لیګ (ن) او یوه یې پیپلز ګوند ترلاسه کړې دي.
انتخاباتي کمېشن د مارچ پر ۳۰مه ویلي ول چې د سېنېټ پر ۴۸ خالي څوکیو له بلوچستانه ټول ۱۱ او له پنجابه اووه نوماندان بې له مقابلې منتخب شوي دي.
ټاکل شوې وه چې د اپرېل پر دویمه د خيبر پښتونخوا د اسمبلۍ غړو هم د سېنېټ په انتخاباتو کې برخه اخیستې وای خو کمېشن د ځانګړو څوکيو پر سر د جنجال له امله کمېشن هلته ټاکنې وځنډولې او د سېنېټ له پاتې ۳۰ څخه پر ۱۹ څوکیو انتخابات وشول.
په دې لړ کې د رايې اچونې بهير د سهار له نهو بجو پيل شو چې د مازيګر تر څلورو بجو روان وو.
په پاکستان کې هر درې کاله وروسته د سېنېټ انتخابات کېږي او استازي يې د شپږو کلونو لپاره ټاکل کېږي.
له ۲۰۲۴ز کال څخه د پاکستان سېنېټ ټول ۹۶ غړي لري چې ورڅخه یې هره صوبه ۱۴ عمومي څوکۍ او نهه ځانګړې څوکۍ لري. د ایین له مخې، هره صوبه د څلورو پوهانو یا د خپلو څانګو متخصصانو، چې ټېکنوکراټان بلل کېږي، او دیني عالمانو، څلور د ښځو او یو مذهبي لږکي څوکۍ لري.
له دې پرته وفاقي پلازمېنه اسلام اباد دوه عمومي او یو د ټېکنوکراټ او یو د ښځو ځانګړې څوکۍ لري.
پخوا قبایلي سیمو هم په سېنېټ کې څوکۍ لرلې خو په ۲۰۱۸ز کال کې چې هغه ضلعې په خیبر پښتونخوا ورګډې شوې نو په تدریجي ډول یې څوکۍ کمې او له ۲۰۲۴ز کال څخه په بشپړ ډول ختمې شوې.
