له کراچۍ سره نېږدې په عرب سمندرګي کې یوه کښتۍ ډوبه شوه چې پکې ۳۱ کب نیوونکي ژوبل شول او ۱۴ لا هم ورک دي.
چارواکي وایي، پېښه د مارچ څلورمې او پینځمې ترمینځ پر شپه کې شوې ده.
د ورکو کب نیوونکو د کورنیو غړو د مارچ پر اوومه، له مشال راډیو سره په خبرو کې له حکومته د بیړني اقدام غوښتنه وکړه چې هغوی وژغوري.
د کب نیونکو د اتحادیې چارواکي کمال شاه مشال راډیو ته وویل چې هغه کسان د ماهیانو د ښکار لپاره سمندر ته تللي ول. هغه وویل، تر درې ورځو تېرو وروسته هم د ۱۴ کسانو درک نه شته.
په کښتې کې ناست ماهیګیر د کراچۍ د ابراهیم حیدري سیمې اوسېدونکي دي.
د سیند اعلاوزیر مراد علي شاه وايي چې د ورکو کب نیوونکو د موندلو لپاره عملیات روان دي چې پکې د پاکستان بحري ځواک سرتېري هم برخه اخلي.
په کراچۍ کې لسګونه زره خلک کب نیونکي دي چې ګڼ پښتانه هم پکې دي. دوی په کشتیو او لانچونو کې د سمندر مینځ ته ورځي او هلته تر څو اوونیو د ماهیانو په ښکار کې تېروي او بیا وچې ته ځي.
ځینې وخت د هغو کب نیونکو کښتۍ د طوفان، باران او د سمندري کمرو سره د جنګېدو له امله ډوبیږي چې مرګژوبله اړوي.
