د اروپایي ټولنې د بهرنیو چارو وزیرانو په سور سمندرګي کې له حوثي یاغیانو څخه د بېړیو خوندي کولو پرېکړه کړې ده.
ډېپلوماټانو د جرمني خبري اژانس ته ویلي چې د فبرورۍ پر ۱۹مه په برسلز کې د ټولنې د بهرنیو چارو وزیرانو په سور سمندرګي کې د اروپايي ټولنې د بحري ماموریت ځای پر ځای کولو منظوري ورکړه.
په ماموریت کې په سور سمندرګي، د عدن خلیج او شاوخوا اوبو کې د اروپايي جنګي بېړیو او د لومړني خبرداري هوايي نظام شامل دي.
البته هغه بېړۍ به له خپلې خوا د ډزو کولو اجازه نه لري، خو که وسلوال ورباندې برید وکړي نو بیا ځوابي کاروايي کولای شي. د هغو بېړیو عملیاتي چارو قومنداني به د یونان په لاریسا ښار کې وي.
ايران پلویو حوثي ياغيانو د ۲۰۲۳ز کال له نومبر راهیسې په سور سمندرګي کې پر مال وړونکو کښتيو حملې زیاتې کړي دي او له کومې تشريح ورکولو پرته وايي چې دا کار د غزې په جګړه کې د فلسطينيانو د ملاتړ لپاره کوي.
برېتانيا او امريکا د هغو حملو په غبرګون کې په يمن کې د حوثيانو مرکزونه ویشتي ول.