د پاکستان سپريم کورټ د هغه هیواد د پارلېمان لپاره د سیاستوالو ټول عمري نااهلي غیر قانوني اعلان کړې ده.
د جنورۍ پر اتمه، سپریم کورټ پرېکړه وکړه چې د ایین تر ۶۲مې مادې لاندې سزا شوي سیاستوال تر پينځو کلونو پورې نااهله ګرځول کېدای شي خو تر هغې وروسته دوی بیا په انتخاباتو کې برخه اخیستلی شي.
د سپریم کورټ د دې پرېکړې پر اساس، د پاکستان ځیني مهم سیاستوال په راتلونکو انتخاباتو کې د ګډون کولو جوګه شوي چې پکې پخوانی وزیراعظم نواز شریف او د استحکام پاکستان ګوند مشر جهانګیر ترین هم شامل دی. هغوی دواړه پخوا د ایین تر ۶۲مې مادې لاندې د ټول عمر لپاره د پارلېمان لپاره نااهله ګرځول شوي ول.
د پاکستان مسلم لیګ (ن)، استحکام پاکستان، تحریک انصاف او ګڼو نورو ګوندونو سیاستوالو د سپريم کورټ د دې پرېکړې هرکلی کړی خو ځیني شنونکي وايي، سترې محکمې ځینو هغو سیاستوالو ته د پارلېمان لاره خلاصه کړې چې د پوځي اسټېبلېشمېڼت سره یې جوړجاړی کړی دی.
