د جنوبي وزیرستان د انګور اډې اوسېدونکي وايي چې له يوې نيمې میاشتې راهیسې يې په احتجاج دي خو حکومت یې غوښتنې نه دې منلې.
په پرلت کې ناست د پښتون ژغورنې غورځنګ ځايي مشر محب وزیر د ډېسېمبر پر ۲۳مه مشال راډيو ته وويل چې دوی له افغانستان سره د انګور اډې لارې پرانیستل، امنيت، بجلي، د موبایل ټېلېفون شبکه (نېټورک)، روغتونونه او د تعليمي ادارو فعالیت غواړي.
د هغه په وينا، سوداګریز ګاډي هم ولاړ دي خو هېڅ حکومتي چارواکي د سلګونو مظاهرچيانو غږ نه دی اورېدلی.
د سیمې انتظامي مشر محمد ناصر مشال راډيو ته وويل چې د پرلتوالو د بیارغونې د کارونو غوښتنې یې منلې او کوښښ کوي چې مسایل حل شي.
د پاکستان حکومت د اکتوبر په مياشت کې افغانستان ته پر تللو ټولو لارو د پاسپوټ او ویزې درلودو شرط لازمي کړی دی چې پر ضد یې په چمن کې هم د اکتوبر له ۲۱مې راهیسې د سیمې خلکو پرلت وهلی دی.
افغانستان ته د تګ راتګ له لارو څخه یې یوه د انګور اډې دهه چې وزيرستان له پکتيکا سره تړي.
