په بلوچستان کې د ترهګرۍ ضد پولیسو ادارې (سي ټي ډي) دعوه کړې چې په کوټه او بسیمه کې یې د داعش او د تحریک طالبان پاکستان (ټي ټي پي) اته وسلوال وژلي دي.
د سېپټمبر پر دویمه په کوټه کې د سي ټي ډي چارواکو په یو بیان کې ادعا کړې چې په کوټه کې یې د عملیاتو پر مهال درې وسلوال هغه مهال ووژل چې د لټون د عملیاتو پر مهال وسلوالو پر پولیسو د لاسي بم برید وکړ.
پولیس وایي چې وژل شوي کسان د داعش ډلې دي خو تر دې مهاله ازادو سرچینو د دې تایید نه دی کړی.
د سي ټي ډي په بیان کې راغلي چې پولیسو د عملیاتو پر مهال څو میاشتې مخکې له کوټې د تاوان لپاره تښتول شوی ماشوم ابوبکر هم له تښتونکو خوشی کړی دی.
دا راز سي ټي ډي په یو بل بیان کې دعوه کړې چې د سېپټمبر په لومړۍ شپه یې په بسیمه سیمه کي د تحریک طالبان پاکستان د وسلوالو پر ضد عملیاتو کې پینځه وسلوال وژلي دي.
داعش او تحریک طالبان پاکستان د سي ټي ډي د دعوو په اړه څه نه دي ويلي.
