د خیبر پښتونخوا په جنوبي وزیرستان کې پر پاکستاني پوځ د وسلوالو په برید کې پینځه سرتیري ژوبل شوي دي.
د ضلعې پولیس او استخباراتي ادارې چارواکو مشال راډیو ته وویل چې د اګست پر ۱۹مه د مکین تحصیل په زیړ سر د وسلوالو سره په نښته کې هغه پوځیان زخمیان شول.
چارواکي وایي تر پېښې وروسته یې په سیمه کې د لټون عملیات پیل کړي دي خو لا یې څوک نیولي نه دي.
تحریک طالبان پاکستان مشال راډیو ته په استولي پیغام کې د برید ذمه واري منلې او ادعا یې کړې ده چې په هغه برید کې یې شپږ پوځیان وژلي دي.
تر دې وړاندې، د اګست پر ۱۴مه په بر جنوبي وزیرستان، لدا تحصیل کې د امنیتي سرتېرو پر ګاډي بمي چاودنه شوې وه چې پکې پینځه سرتېري ژوبل شوي ول.
