په بر جنوبي وزیرستان کې د امنیتي سرتېرو یو ګاډی د سړک تر غاړې ښخ بم چاودنې ښکار شوی دی چې پکې پینځه سرتېري ژوبل شوي دي.
د پولیسو او استخباراتي ادارو چارواکو د نوم نه ښوولو په شرط مشال راډیو ته وویل چې پېښه د اګست پر ۱۴مه د لدا تحصیل په کړمه سرای کې شوې ده او ژوبل سرتېري د اېف سي ځواک غړي دي.
چارواکو ویلي دي چې تر رېموټ کنټرول بمي برید وروسته یې په سیمه کې د لټون عملیات پیل کړي دي.
د تحریک طالبان پاکستان (ټي ټي پي) ویاند محمد خراساني مشال راډيو ته په استولي بیان کې د برید ذمه واري منلې ده.
