اوکراینی ولسمشر وولودیمیر زېلېنسکي وايي، د هغه هېواد په ختیځ کې پر پوکروفسک ښار د روسیې د دوو توغندیو په برید کې د وژل شویو شمېر نهه ته رسېدلی او پکې ۸۲ تنه ژوبل دي.
هغه حمله د اګست پر اوومه شپې مهال شوې وه او زېلېنسکي د اګست پر اتمه پکې د وژل شویو او ژوبلو د شمېر زیاتوالي خبر ورکړ.
نوموړي په خپله ماښامنۍ ویډیويي وینا کې وویل چې له ژوبلو سره اړینې مرستې کوي.
ولسمشر زېلېنسکي په خپلو خبرو کې د بریدونو وخت ته هم پام واړاوه او و یې ویل چې د دویم توغندي برید هغه مهال شوی چې کله تر لومړۍ حملې وروسته د پېښې په ځای کې د ژغورنې عملیات روان ول.
سیمه ییزو چارواکو ویلي دي چې په برید کې رهایشي او انتظامي ودانۍ، یو هوټل (مېلمستون)، د خوړو پخلنځایونه او دوکانونه زیانمن شوي دي.
خو روسیې دعوه کړې ده چې د توغندیو په برید کې یې د اوکرایني پوځ د قومندې پوسته په نښه کړې ده.
