د افغانستان د احصاییې ملي ادارې، چې د طالبانو تر کنټرول لاندې ده، د الېکټرونیکي تذکرې لپاره نوې بیې ټاکلې دي.
دې ادارې د اګست پر اوومه په خپله خبرپاڼه کې ليکلي چې په مرکزونو کې د الېکټرونیکي تذکرې بیه ۵۰۰ افغانۍ او په اسان خدمت اداره کې ۷۰۰ افغانۍ ده.
د افغانستان د تېر جمهوري حکومت پر مهال د الېکټرونیکي تذکرې بیه ۱۰۰ افغانۍ وه، خو د ۲۰۲۱ز کال د اګست پر ۱۵مه واک ته د طالبانو له رسېدو وروسته ۳۰۰ افغانۍ ته پورته شوه چې اوس ۲۰۰ افغانۍ نوره اضافه پکې شوې ده.
د طالبانو حکومت د تذکرو د بیې د لوړېدو لامل نه دی څرګند کړی.
د طالبانو حکومت په وروستیو کې ويلي ول چې د الېکټرونیکي تذکرو د وېش مرکزونه یې زیات کړي او هڅه کوي چې نور یې هم زیات کړي.
