د خیبر په تیرا کې د پولیو د واکسیني ډلې پر ساتونکو په برید کې درې پولیس سرتېري ژوبل شوي دي.
د ضلعي پولیسو ویاند ظهیر اپرېدي مشال راډیو ته وویل چې حمله د مې پر ۲۵مه سهار نهه بجې د تیرا ملک دین خېلو په میر دره کې شوې ده.
دی وايي، روغتیايي کارکوونکو ماشومانو ته د پولیو واکسین ورکول چې وسلوالو یې پر ساتونکو پولیسو حمله وکړه.
اپرېدی وايي، په حمله کې روغتیايي کارکوونکي محفوظ دي او د ژوبلو سرتېرو حالت هم د ډاډ وړ دی.
د خیبر د پولیسو ویاند وايي، هلته موجودو پولیسو پر وسلوالو ډزې وکړې خو هغوی په تېښته کې بریالي شول.
ظهیر اپرېدی زیاتوي چې تر پېښې وروسته سیمې ته نور سرتېري رسېدلي دي.
د حملې ذمه واري چا نه ده منلې.
په پاکستان کې تر دې مخکې هم د پولیو روغتیايي ډلو او د هغوی پر ساتونکو حملې شوې دي.
د مې پر ۱۹مه د بلوچستان د مستونګ ضلعې په سور کارېز کې وسلوالو د پولیو د واکسیني ډلې ساتونکی پولیس سرتېری وواژه.
پاکستان او افغانستان د نړۍ یوازیني هېوادونه دي چې پکې د پولیو وایرس موجود دی.
