د سعودي عرب مکې ښار په یو هوټل کې اور لګېدو په پېښه کې اته پاکستانیان مړه او شپږ نور ټپیان شوي دي.
د پاکستان دولتي راډيو، د مې پر ۲۰مه، د بهرنيو چارو وزارت په حواله خبر ورکړي چې په جده کې د پاکستان ماموریت د متاثرینو او د هغوی له کورنیو سره په تماس کې دی.
وزيراعظم شهباز شريف په پېښه کې پر اوښتي زیان خفګان ښکاره کړی دی.
پاکستانيو رسنیو لیکلی چې د پېښې ښکار شوي کسان هلته د عمرې لپاره تللي ول او په هغه هوټل کې اوسېدل.
په سعودي عرب کې په ځینې وختونو کې په هوټلونو کې د اور لګېدنې پېښې مخې ته راځي. په ۲۰۱۴ز کال کې د مدينې ښار په هوټل کې د اور لګیدو له وجې لږ تر لږه ١٢ کسان وژل شوي او ١٣٠ تنه نور زخمیان شوي ول.
