د خيبر پښتونخوا په کواټ ضلع کې د دوو قبيلو ترمينځ د ځمکې پر سر را پورته شوې شخړه کې لږ تر لږه ۱۶ کسان وژل شوي او درې ژوبل شوي دي.
د پوليسو وياند فضل نعيم پرون (د مې پر ۱۵مه) مشال راډيو ته وويل چې دا شخړه د کواټ په پخوانۍ نيمه قبايلي سيمې دره ادم خېلو کې د سني خېل او زرغون خېل قبيلو تر مينځ شوې ده.
نوموړي زياته کړه چې په هغه سيمه کې د کويلې د يوه کان د ملکيت پر سر د دواړو قبيلو ترمينځ له اوږدې مودې راهيسې لانجه روانه وه او کله چې د مې پر ۱۵مه د هغې لانجې د هواري لپاره سره راټول شول نو نښته وشوه.
د فضل نعیم په وینا، د دې نښتې په پایله کې ۱۶ کسان وژل شوي او درې نور ژوبل شوي دي چې ټول د زرغون خېلو سېول روغتون ته رسول شوي دي.
د دره ادم خېلو يو ځايي خبريال ظفر اپرېدي مشال راډيو ته ويلي چې د سني خېلو او زرغون خېلو تر مينځ د کويلې د غرونو پر سر له تېر يو کال راهيسې لانجه روانه وه چې د دواړو ترمينځ څو ځلې جرګې هم شوې دي.
تر پېښې وروسته پوليس سيمې ته رسېدلي او د تازه راپورونو له مخې د دواړو قبيلو ترمينځ ډزې درېدلې دي.
د خيبر پښتونخوا په قبايلي سيمو کې تر دې وړاندې هم د ځمکو پر سر لانجې شوې چې يوشمېر کسانو ته پکې مرګژوبله اوښتې ده.
