د مې په ۱۲مه حکومت د تري منګل پېښې د قربانیانو پر کورنیو د «شهدا پیکېج» لاندې دوه نیم کروړه روپۍ ووېشلې.
د مې پر څلورمه د خیبر پښتونخوا په کورمه کې د ډزو په دوو جلا، جلا پېښو کې د ښوونځي د استادانو په ګډون لږترلږه اووه تنه وژل شوي وو.
تېره ورځ د حکومتي استازو په مشرۍ کې یوه غونډه وشوه پکې د د هر وژل شوي استاد کورنۍ ته ۵۵ لاکه روپۍ ورکړل شوې. همدا د هر وژل شوي مزدور کورنۍ ته بیا لس لکه روپۍ ورکړل شوې.
د تري منګل پېښې قربانیانو کورنیو ته د پیسو د چیکونو د وېشلو پر مهال د پاکستان وفاقي وزیر ساجد حسېن توري وویل، دا مرستې د ځاني زیانونو بدل نه شي کېدای خو بیا به هم دومره وشي چې اغېزمنو کورنیو سره به مرسته وشي او د هغوی ستونزې به ورسره تر یوه بریده هوارې شي.
د کورمې ضلعي پولیسو مشر محمد عمران مشال د مې پر پنځمه مشال راډیو ته ویلي وو، د مې پر څلورمه ماسپښین شاوخوا یوه بجه "نامعلومه" کسانو پر شلوزان سړک پر یوه ګاډي برید وکړ چې پکې د ګېدو سیمې یو اوسېدونکی ووژل شو.
دی وايي، تر دې وروسته په تري منګل سیمه کې پارېدلي کسان یو سرکاري ښوونځي ته ورداخل شول او هلته یې ډزې وکړې چې پکې د څلورو استادانو په ګډون شپږ تنه ووژل شول.
د عمران په خبره، هغو خلکو دا ګومان کړی وو چې په ښوونځي کې یې د مخالفانو د سیمې استادان د بورډ امتحانونو دنده ترسره کوي، نو ځکه په سکول ورغلل. په یاد سکول کې یوازې شیعه استادان وژل شوي ول.
د پولیسو مشر وايي چې په ښوونځي کې وژل شوي کسان د کورمې د بېلابېلو سیمو اوسېدونکي ول.
عمران وايي، له لومړنیو معلوماتو ښکاري چې دواړه پېښې د پیواړ او د ګېدو ترمینځ د ځمکې او ځنګله د پخوانۍ لانجې له کبله شوې دي، خو زیاتوي چې پلټنې روانې دي او وضعیت اوس کنټرول دی.
په بره کورمه کې د پیواړ علیزي د ګیدو له منګلو سره د ځنګل پر ملکیت لانجه لري چې پر سر یې په ۲۰۲۱ز کال کې د دواړو خواوو ترمینځ پینځه ورځې نښتې شوې وې چې پکې ۱۶ کسان وژل شوي او ۱۵ ژوبل شوي ول.
د مې پر ۱۲مه، په سیمه کې څه ناڅه ۲۰۰ ښوونکیو چې له شیعه مسلک سره یې تړاو درلود په یوه خبري غونډه کې وویل، هغوی د سنيانو په سیمه کې کار کولو ته اماده نه دي ځکه چې ډارېږي وبه وژل شي.
د کړمان سیمې یو استاد بلال حسېن مشال راډیو له وویل، تر څو ورته د خوندیتوب ضمانت نه وي ورکړل شوی، په سني سیمو کې به خپله وظیفه پر مخ وې نه سي.
خو بل پلو، د سني مسلک مشرانو د ترې منګل پېښه غندلې او دا یې د سیمې د امنیت د خرابولو یو سازش بللی دی. د پیرقیوم سیمې د قامي کمېټۍ بو مشر حکومت خان حکمتیار د مې پر ۱۳مه مشال راډیو له وویل:
"په سیمه کې د یوې خاصې طبقي د خلکو هدفي وژنې د علاقې د امنیت د خرابولو او په خپلو کې د کرکې خپرولو یوه هڅه ده."
نوموړي د شیعه مسلک د استادانو د هغې غوښتنې د ملاتړ اعلان هم وکړ چې سني استادان دې د شیعه ګانو او شیعه استادان دې د سنیانو په سیمو کې وګمارل شي.
په کورمه کې د وروستیو پېښو وروسته حالات تر دې خراب شوي ول چې په ځینو سیمو کې د تګ راتګ لارې تړل شوې وې، سکولونه بند وو، امتحانونه ځنډول شوي وو او پر موبایل انټرنیټ هم محدودیتونه لګول شوي وو. خو د مې پر اتمه د شیعه او سني مشرانو ترمنځ له ترسره شوې جرګې وروسته د امنیت فضا ترسترګو کېږي.
