سپینې ماڼۍ اټکل کړی چې د ډېسېمبر له میاشتې راهیسې د اوکراين په جګړه کې د روسيې تر يو لاک زیات کسان وژل شوي او ژوبل شوي دي.
دا په داسې حال کې ده چې اوکراین د هغه هېواد په ختیځ کې د روسيو ځواکونو له خوا د سختو بریدونو مخه نیولې ده.
د سپینې ماڼۍ (وايټ هاوس) د ملي امنیت شورا ویاند جان کربي د مې پر لومړۍ نېټه وویل چې دا اټکل د امریکا د تازه افشا شویو استخباراتي معلوماتو پر بنیاد شوی دی. په خپلواک ډول د دې شمېرو تصديق نه شي کېدلی.
د امریکا د ګډو وسلوالو ځواکونو مشر جنرل مارک میلي د تېر کال (۲۰۲۲ز) په نومبر میاشت کې ادعا کړې وه چې د جګړې په لومړیو اتو میاشتو کې د روسيو ځواکونو تر ۱۰۰ زرو زیات کسان وژل شوي او ژوبل شوي دي.
روسيو ځواکونو د ۲۰۲۲ز کال د فبرورۍ پر ۲۴مه پر اوکراين یرغل پيل کړ. دوی د اوکراين په ختيځ کې ګڼې سیمې لاندې کړې دي خو په ځينو ځایونو کې د اکراينيوو ځواکونو له کلک مقاومت سره مخامخ دي.
