د هند د ۲۰ اووره کرکټ د غوره لیګ (انډیین پریمییر لیګ یا ای پي اېل) په سیالیو کې ګجرات ټایټنز له کولکته نایټرایډرز او سنرایزرز حیدر اباد له پنجاب کېنګز سره مخامخېږي.
د اپرېل پر نهمه لومړۍ لوبه د احمداباد په نرېندرا مودي لوبغالي کې د ګجرات ټایټنز او کولکته نایټرایډرز ترمینځ کېږي چې د پېښور له وخت سره سم، د ماسپښین پر درو بجو پیلېږي.
د ګجرات په لوبډله کې د افغان ملي لوبډلې راشد خان او د کولکتې په ټیم کې رحمان الله ګربز شامل دي.
ټاکل شوې چې د حیدراباد په راجیو ګاندي لوبغالي کې د کوربه لوبډلې سنرایزرز حیدراباد او پنجاب کېنګز ترمینځ سیالي د پېښور پر وخت د ماښام پر اووه او د کابل پر شپږ نیمو بجو پیل شي.
د حیدراباد په لوبډله کې د افغانستان تېز توپ اچوونکی فضل حق فاروقي شامل دی.
تر دې یوه ورځ مخکې د اپرېل پر اتمه د ای پي اېل په سیالیو کې چېنای سوپر کېنګز لوبډلې ممبۍ انډیینز ته په اووه وېکټو او راجستان رایلز، دلي کیپېټلز ته په ۵۷ منډو ماتې ورکړه.
د هند غوره لیګ سیالۍ د مارچ پر ۳۱مه پیل شوي چې د مې تر ۲۸مې پورې به روانې وي.
