د اوکراین ولسمشر وولودیمیر زیلېنسکي د روسیې لخوا د ملګرو ملتونو د امنیت شورا پر مشري کولو نيوکې کړې دي.
ولسمشر زیلېنسکي ویلي: "دا یو بې منطقه او ورانوونکی ګام دی چې روسیې د ملګرو ملتونو د منیت شورا مشري پیل کړې ده."
دا له هغه وروسته ده چې روسیې د اپرېل پر لومړۍ نېټه د یوې میاشتې په موخه د ملګرو ملتونو د امنیت شورا مشري پیل کړه. دوی ته دا مشري په دوره يي شکل رسېدلې ده. د تير کال په فرورۍ مياشت کې پر اوکراين د روس تر يرغل وروسته، دا لومړی ځل دی چې مسکو د دې شورا مشري پر غاړه اخلي.
خو ولسمشر زیلېنسکي ویلي "څوک چې ترهګرۍ کوي هغوی باید د نړیوالو ادارو مشري ونکړي." نوموړي زیاته کړې چې چې د روسیې پوځ یو پلو په اوکراین کې د پنځو میاشتو بل ماشوم وژلی دی او په عین وخت کې د ملګرو ملتونو د امنیت شورا مشري کوي.
د روسیې له خوا تراوسه د اوکراین ولسمشر د دې څرګندونو په اړه غبرګون مخې ته نه دی راغلی.
