د پاکستان کرکټ لوبډلې د دریو ۲۰ اووریزو لوبو د لړۍ په وروستۍ لوبه کې افغانستان ته په ۶۶ منډو ماتې ورکړه.
د مارچ پر ۲۷مه په شارجه کې شوې دغه لوبه کې پاکستان لومړی بېټنګ وکړ او په ټاکل شويو ۲۰ اوورونو کې يې د اوو لوبغاړو په سوځېدو ۱۸۲ منډې جوړې کړې.
په ځواب کې د افغانستان ټول لوبغاړي په ۱۹م اوور کې د ۱۱۶ منډو له جوړولو وروسته وسوځېدل.
د افغانستان په کوربه توب د دريو ۲۰ اووريزو لوبو د لړۍ لومړۍ دوې لوبې افغان لوبډلې ګټلې وې او لوبلړۍ يې په خپل نوم کړې وه.
د مارچ پر ۲۴مه په شوې لومړۍ لوبه کې افغانستان پاکستان ته په شپږو ويکټونو او د مارچ پر ۲۶مه يې په دويمه لوبه کې په اوو ويکټونو ماتې ورکړې وه.
افغان لوبغاړی محمد نبي د لوبلړۍ غوره لوبغاړی شو.
