په ترکيې او شام (سوریه) کې د فبرورۍ پر شپږمې په دوو زلزلو کې د وژل شويو کسانو شمېر تر ۲۴ زره واوښت.
په ترکیه کې له پېښو او بېړنیو حالاتو سره د مبارزې ادارې د فبرورۍ پر ۱۱مه اعلان وکړ چې د وروستۍ خونړۍ زلزلې له امله په هغه هېواد کې د وژل شویو کسانو شمېر تر ۲۰ زره اوښتی دی. یاده اداره وایي، د فبرورۍ تر ۱۱مې په ترکیه کې د زلزلې له وجې د وژلو شویو کسانو شمېره ت ۲۰،۶۰۰ ته رسېدلې ده.
له پېښو او بېړنیو حالاتو سره د مبارزې اداره دا هم وايي چې د زلزلې په نتيجه کې په هغه هېواد کې تر ۸۰ زره زيات کسان ژوبل شوي هم دي. بل خوا د ترکيې په جنوب کې له زلزله ځپلو سيمو څخه څه باندې ۷۵،۰۰۰ کسان ايستل شوي دي. هلته د خلکو ژغورنې او مرستو رسولو په عملياتو کې له ۱۲۰،۰۰۰ څخه زیات کسان برخه اخلي.
په همدې حال کې د شام د حکومت او حکومت مخالفه یاغیانو تر کنټرول لاندې د شمال لوېديزې سیمې ژغورونکي وايي چې په هغه هېواد کې د زلزلې له وجې تر درې نیمو زرو زیات کسان وژل شوي او لسګونه زره نور ژوبل دي.
د شام زلزله ځپلې سیمې زياتره د ولسمشر بشارالاسد د حکومت د مخالفو ډلو تر کنټرول لاندې دي او هلته د فبرورۍ پر نهمه د ملګرو ملتونو د بشري مرستو لومړۍ جوپه ور ورسېده.
په ترکیه کې د فبرورۍ په شپږمه سهار وختي د اووه اعشاریه درجې راغلې زلزلې هلته مېشت افغان کډوال هم د سر او مال له زیان سره مخامخ کړي دي. په انقره کې د افغانستان د سفارت د معلوماتو له مخې د فبرورۍ تر ۱۱مې هلته شاوخوا ۲۰۰ افغانانو ته هم مرګ ژوبله اوښتې ده. سفارت وايي افغان کډوال د ترکیې په هاتای او غازي عین تیپ ښارونو کې زیات ځپل شوي دي.
په انقره کې د افغانستان د سفارت قونسل پسرلي حکیمي مشال راډیو ته په یوه رالېږلي پیغام کې تایید کړه چې د فبرورۍ په ۱۰مه، په ادیامان ولایت کې د ۳۵ نورو افغانانو مړینه تثبیت شوه.
ځینو رسنیو په ترکیه کې د افغان کډوالو د ټولنې په وینا خبر ورکړی دی چې ښایي د افغانانو تلفات د دې زلزلې له امله د ۲۰۰ او ۳۰۰ ترمنځ وي، خو په انقره کې د افغانستان قونسل حکیمي مشال راډیو ته وویل چې دا شمېرې نه شي تاییدولای ځکه چې لاهم د ژغورنې هڅې روانې دي.
په انقره کې د افغانستان قونسل وایي چې څو زلزله ځپلو ښارونو ته یې پلاوي تللي چې د قربانیانو دقیقې شمېرې راغونډې کړي.
تر دې مخکې په ترکیه کې د اتیا افغان کډوالو مړینه تایید شوې وه چې په ادیامان ولایت کې له پرونیو شمېرو سره تر دې دمه په دې زلزله کې د مړو شویو افغانانو شمېر ۱۵۰ ته ورسېد.
پسرلي حکیمي د فبرورۍ په ۱۰مه مشال راډیو ته ویلي وو چې د ترکیې په زلزله کې د ۸۰ مړو شویو افغانانو مړي خاورو ته سپارل شوي دي.
د ملګرو ملتونو د عالي کمېشنرۍ د اټکل له مخې شاوخوا درې لکه افغان کډوال په ترکیه ژوند کوي چې نیمایي یې د اوسېدو قانوني اسناد نه لري.
